El Gobiernu d’Asturies presentó esta mañana en Bruxeles la ufierta turística d’Asturies énte mediu centenar d’axentes y prescriptores del sector. Ye la primer de les presentaciones internacionales que les viceconseyeríes de Turismu ya Infraestructures tienen previstu realizar en mercaos internacionales col fin de rentabilizar la nueva ufierta de conectividá aérea d’Asturias.
Al actu celebráu na capital belga asistieron la viceconseyera de Turismu, Graciela Blanco, el viceconseyeru d’Infraestructures, Jorge García, l’embaxador d’España en Bélxica, Alberto Antón, y el director de la Oficina Española de Turismu en Bruxeles, Miguel Nombela.
Graciela Blanco sintetizó la campaña cola frase “el Paraísu Natural a dos hores de Bruxeles”, énte un gran panel col lema El paraísu, a 110 minutos de Bruxeles. La viceconseyera repasó na so intervención los principales activos turísticos del Principáu, ente los que destacó “la so alta calidá medioambiental y la so singularidá paisaxística, que combina mariña y monte”, amás del potencial pal turismu deportivu y d’aventura que tien la comunidá. Tamién fixo especial mención al ecoturismo, y recordó qu’Asturies ye l’abellugu onde habiten los osos pardos selvaxes” n’Europa Occidental.
Blanco destacó na so intervención el valor del legáu cultural reconocíu pola Unesco como Patrimoniu Mundial, faciendo referencia al Prerrománicu, les cueves con arte rupestre paleolíticu y los itinerarios asturianos del Camín de Santiago.
Na so intervención, la viceconseyera mentó a Avilés, Xixón y Uviéu, los trés grandes ciudaes que calificó como “núcleos urbanos seguros y con bellos centros históricos”. Coles mesmes, señaló la fortaleza y la riqueza del turismu rural y fixo especial referencia a les marques calidable Casones Asturianes y Aldegues. La gastronomía tamién tuvo presente na so intervención y, de manera singular, nel actu, nel qu’Adrián Mancheño y Miguel Sierra realizaron una demostración so la marca Cocina de Paisaxe.
Finalmente, la viceconseyera convidó a los asistentes a viaxar a Asturies aprovechando les dos frecuencies selmanales en conexón aérea directa que xunen Bruxeles con Asturies.
