Esta tarde actívase’l plan de seguridá de la 85 edición del Descensu Internacional del Seya, ellaboráu pol Serviciu d’Emerxencies del Principáu d’Asturies (SEPA) que va tar operativu, de forma ininterrumpida, dende les 18.00 hores de güei hasta les 11 hores del próximu domingu 6 d’agostu. La collaboración y coordinación ente l’Alministración autonómica y los conceyos va dexar movilizar a más de 370 efectivos, a los que se van sumar tamién los medios y recursos de les fuerces y cuerpos de seguridá del Estáu.
L’oxetivu del plan ye entamar y planiar la respuesta más rápida y eficaz énte les emerxencies que puedan producise estos díes nos conceyos de Ribeseya y Parres, onde la fiesta va rexuntar a decenes de miles de persones. Asina na redoma del centru de salú de Ribeseya va constituyise, per tercer añu, el centru de coordinación operativa (CECOP-Sella), nel que s’integren, so un mandu únicu, tolos grupos d’acción, con independencia del organismu al que pertenezan (intervención, orde, atención sanitaria, loxística y sofitu).
Anguaño van movilizase mediu centenar de vehículos terrestres, aéreos y acuáticos; ente otros, los camiones de coordinación y mandu del SEPA, el puestu d’asistencia médica avanzada del Serviciu d’Atención Médica Urxente (SAMU), más de cuarenta vehículos de tresporte ya intervención ente los que figuren dos autobombes urbanes llixeres, dos embarcaciones de salvamentu, una moto acuática, dos unidaes medicalizadas, cuatro ambulancies, l’helicópteru medicalizado col Grupu de Rescate de Bomberos del SEPA, del que forma parte un médicu-rescatador y l’Unidá de Drones del SEPA. Esti dispositivu complétase colos medios materiales y humanos movilizaos per parte de les fuerces y cuerpos de seguridá del Estáu.
Incidencies rexistraes en 2022
El pasáu añu recibiéronse 234 llamaes nel Centru de Coordinación Operativa (CECOP SELLA) de les cualos 119 riquieron la movilización de dalgún de los recursos adscritos a esti plan. La mayor parte de les emerxencies fueron de calter sanitariu, concretamente contabilizáronse 64 incidencies d’esti tipu (14 en Parres y 50 en Ribesella). Amás, tamién se rexistraron incidentes rellacionaos con alteraciones del orde públicu, ente otros, robos, agresiones y accidentes de tráficu.
