A pocos díes de la votación que va determinar el viniente gobiernu en Xixón, onde la candidata forista Carmen Moriyón negocia pa consiguir el sofitu de los grupos de la derecha y la estrema derecha, el vicesecretariu d’estratexa de la formación, José Suárez Arias-Cachero «Felechosa», ta acabante amosar el so descontentu cola posibilidá de que se pacte con VOX al traviés d’un tuit nel que nun ye difícil descifrar les claves y qu’amuesa un descontentu más estendíu na organización. Nel testu fai delles referencies hestóriques y pide ser «resistentes al fascismu», citando nel mesmu a dellos miembros de la organización de Foro en Xixón.
Negar la realidad o llamar al fascismo de otra manera no nos hará resistentes a él.
El fascismo es un problema grave que conduce al despotismo y a la violencia azuzando lo peor de nosotros mismos:
el resentimiento, el odio, la xenofobia y el miedo.
La historia nos enseña que… pic.twitter.com/h4KEiTHeo8— José Suárez Arias-Cachero Felechosa (@JoseSuarez) June 14, 2023
Foro Asturias, que xurdió en 2011 del descontentu de militantes del PP pola non inclusión de Francisco Álvarez Cascos, asina como d’otres persones que veníen de formaciones y tradiciones ideolóxiques sobre manera venceyaes al asturianismu, vese agora dixebráu internamente por una decisión que supón un tragu difícil pal sector asturianista, al que pertenez José Suárez Arias-Cachero «Felechosa» asina como l’únicu diputáu que caltién la formación, Adrián Pumares.
Los ataques vivíos por Adrián Pumares nes campañes de VOX y les sos organizaciones satélite mientres l’alderique sobre la reforma estatutaria, a cuenta de la so postura nun principiu favorartbile a la oficialidá, xeneren especial rocea en parte de la formación forista a la hora de llegar a alcuerdos cola formación ultraderechista. Esti sector tuvo que xustificar nos últimos meses les dures condiciones impuestes pola dirección de Foro que llevaron al fracasu de la negociación sobre la oficialidá. Aceptar agora un pactu colos mayores detractores de la oficialidá sedría una cesión nueva complicada de xustificar por figures como Felechosa, que s’identifica coles tesis lliberales, centristes y democrátiques, y que va unos meses falaba de que-y prestaría «Un PNV a l’asturiana», en referencia al futuru de Foro.
Según informaciones ufríes esta mañana por Onda Cero Xixón, les conversaciones ente Foro y VOX pa pactar un alcuerdu que permita a Moriyón gobernar el conceyu taríen rotes nesti momentu, lo que fadría qu’esti sábadu nel plenu d’investidura Xixón siguiera en manes de los socialistes y con Floro como alcade, al ser la llista más votada.
Los resultaos de Foro Asturias en Xixón d’esti pasáu 28M, con Carmen Moriyón al frente (8 conceyales de 27), nun permiten un gobiernu en solitariu a los foristes, que dependen agora tanto del PP (5 conceyales) como de VOX (2 conceyales). La llei electoral obliga a configurar una mayoría absoluta pa investir a los alcaldes y alcaldeses que nun son primer fuercia política nel plenu, plaza qu’en Xixón quedó en manes del PSOE (9 conceyales).
VOX recuerda a Moriyón que solo sedrá alcaldesa si entren al gobiernu de Xixón
