Los resultaos algamaos por Foro Asturias en Xixón, con Carmen Moriyón al frente (8 conceyales de 27), nun permiten un gobiernu en solitariu a los foristes, que dependen agora tanto del PP (5 conceyales) como de VOX (2 conceyales). La llei electoral obliga a configurar una mayoría absoluta pa investir a los alcaldes y alcaldeses que nun son primer fuercia política nel plenu, plaza qu’en Xixón quedó en manes del PSOE (9 conceyales).
Esta circunstancia obliga a Carmen Moriyón a buscar alcuerdos tanto col PP como con VOX, y dambes fuercies amosaron yá la so intención de sumase al sofitu a Moriyón, pero siempres dende dientro del equipu de gobiernu, con conceyalíes propies, como yá fixeron VOX y PP repartiéndose les conseyeríes nel gobiernu de Castiella y Llión.
Esta ye una circunstancia complicada pa Foro, que na llexislatura asturiana anterior vivió fuertes ataques dende VOX al so cabezaleru parllamentariu, Adrián Pumares. Campañes qu’incluyeron montaxes fotográficos, pegadielles nos que se calificafa a Pumares de «traidor» y otros elementos propagandísticos nos que-y recriminaben la so postura abierta al alcuerdu pa la reforma estatutaria con oficialidá pal asturianu.
Moriyón habrá enfréntase agora a la disyuntiva. Escoyer ente pactar coles formaciones de la derecha y la estrema derecha centralista coles que compartió actu, xunto tamiénn a Cascos y Pumares, na yá célebre manifestación pola unidá d’España de Colón, celebrada en Madrid en 2019, o evitar estos pactos p’avanzar nel proyectu autonomista al que señalen nos últimos meses dende’l so partíu. Sobre aquella presencia de Foro en Colón, Moriyón, tres que se-y recriminara compartir actu con VOX, declaró «Fui a Colón a defender la unidá d’España; fui llibremente y nun m’arrepiento». Sicasí, nel añu caberu la so postura foi la de que «nada teníen de falar» cola formación d’Abascal tres los insultos y la campaña d’acosu sobre’l so voceru parllamentariu Adrián Pumares.
Sobre una d’estes dos postures, la qu’avera a Foro a PP y VOX, o sobre’l caltenimientu de la so independencia y el so viraxe hacia l’asturianismu, tendrá de decidise Moriyón enantes del 17 de xunu, fecha na que van constituyise los plenos de los conceyos y escoyese los gobiernos municipales. En casu de nun esistir un alcuerdu que-y dea a lo menos 13 votos de los 27 del plenu, gobernaría la primer fuercia política, nesti casu’l PSOE, que namás necesitaría una mayoría simple, la que sumaría colos partíos de la izquierda, Convocatoria por Xixón (IX-MP-IAS) (2) y Podemos (1), que sumaríen 12 conceyales. Otres opciones, como les d’un gobiernu del PSOE y Foro o PP paecen imposibles nesti momentu y col horizonte de les elecciones estatales del 23 de xunetu de fondu. El sábadu 17 de xunu desvelaránse munches respuestes na Casa Conceyu de Xixón.
