El pozu Carrio va tresformase nun centru d’innovación punteru pa probar tecnoloxía industrial

L’antiguu pozu mineru de Carrio, nel conceyu de Llaviana, va tresformase nun centru d’innovación con trés espacios estremaos que se van dedicar a llaboratoriu de pruebes industriales pa desenvolvimientu tecnolóxicu, actividaes empresariales y acciones culturales. Van destinase cerca de 2,7 millones, cofinanciaos col Fondu de Transición Xusta (FTJ), a la remodelación de les instalaciones esteriores de la mina y el desenvolvimientu del proyectu.

El proyectu surde de la idea de tresformar y reutilizar antigües esplotaciones mineres que, como Carrio, producíen carbón hasta apocayá. La cesión de la instalación per parte d’Hunosa y la puesta en marcha d’una asociación integrada por instituciones y empreses y liderada pol gobiernu d’Asturies faen posible esta nueva iniciativa, que busca contribuyir al tresformamientu económicu d’Asturies y la reactivación de la contorna minera, nesti casu, na cuenca del Nalón.

El centru d’innovación de Carrio pretende convertise nun espaciu clave pa la preindustrialización; esto ye, un puntu de referencia pa realizar pruebes de tecnoloxía industrial. Tanto los edificios qu’enantes sirvieron de sala d’aseos, llampistería o taller de forxa, como les zones esteriores, van tresformase en llaboratorios, plantes pilotu y nuevos espacios de trabayu. El centru va impulsar, ente otres acciones, les siguientes:

• Invernaderos 4.0 dedicaos a l’agricultura y l’alimentación del futuru, centrada en bioprocesos, probióticos y prebióticos. Tamién se van instalar cultivos baxo tierra con lluz led, dientro d’un plan pilotu del Serviciu Rexonal d’Investigación y Desenvolvimientu Agroalimentario (Serida).
• Comunidaes enerxétiques sostenibles, centraes en minirredes y bioenerxía.
• Movilidá, con proyectos sobre’l vehículu autónomu y llétricu.
• Dixitalización, al traviés d’iniciatives venceyaes a la realidá virtual y la intelixencia artificial.
• Acciones na área forestal pa probar drones, internet de les coses (IoT), nuevos materiales y robotización.

Dos de los espacios principales del centru d’innovación van asitiase en zones fundamentales pa los y les trabayadores de la mina enantes de baxar a les galeríes del pozu:

La sala de les máquines va ser el motor y l’espaciu de desenvolvimientu tecnolóxicu industrial, va ocupar l’edificiu que s’utilizaba de taller y forxa de materiales y va incluyir dos zones: un espaciu de demostración, pa pruebes de prototipos, y otru de industrialización, pa modelos tecnolóxicos d’usu industrial.

La vida nel pozu va centrase nel área onde los mineros preparar p’aportar al castillete y baxar a la mina. L’antigua casa d’aseos va ser una zona d’alcuentru, reflexón y organización de xornaes, mientres que la llampistería va destinase a espaciu d’esposiciones efímeres, cola innovación na minería como temática pa la primer intervención que se programe.

A lo último, como complementu, na zona del antiguu pozu Barredos, nel mesmu complexu, asítiase la galería, equipamientu nel que va actuar el Conceyu de Llaviana, pensáu como espaciu p’alcuentru y trabayu d’empreses, zona museística, proyectos culturales, y acciones gastronómiques como showcooking.