La conseyera de Presidencia, Rita Camblor, destacó’l so compromisu cola modernización de l’Alministración, acelerada poles esixencies derivaes de la crisis sanitaria. El presupuestu del so departamentu acuta 45 millones p’afondar na dixitalización y ameyorar el serviciu a la ciudadanía. Les cuentes de la conseyería xuben a 214.448.718 euros, un 7% más qu’esti añu.
Presidencia va centrar los sos recursos en dos oxetivos prioritarios: la meyora de les infraestructures de xusticia y la modernización de l’Alministración por aciu un ambiciosu proyectu de desenvolvimientu de les tecnoloxíes de la información y la comunicación que s’allinia cola estratexa del Programa Europa Dixital 2021-2027. En relación con esta segunda meta, la dotación de Sistemes d’Información y Telecomunicaciones va xubir 5,8 millones p’asitiase en más de 45. La xubida supón una medra del 14,8% al respective de 2020. D’esta cantidá, casi 40 millones van dedicase a infraestructures, aplicaciones, llicencies, equipos y otres inversiones en material informáticu.
El capítulu d’inversiones algama 14,2 millones (un 31,5% del total). Adicionalmente, la Dirección Xeneral d’Estratexa Dixital va encargase de xestionar los proyectos de dixitalización d’otres conseyeríes, como Educación, Salú o Derechos Sociales.
El retu al que s’enfrenta’l Principáu nos próximos años ye camudar la percepción d’una Alministración reguladora a una más accesible y cercana qu’ufierte ferramientes d’ayuda en munches actividaes de la vida diaria y, pol so puestu, en tolo que tenga que ver cola relación colos servicios públicos. Esti ambiciosu programa va convertir a l’Alministración nun elementu tractor pa la mesma tresformción dixital d’Asturies.
La pandemia y el confinamientu esixeron un esfuerzu extra pa modernizar l’Alministración. Por casu, mientres el primer estáu d’alarma tramitáronse más de 40.000 espedientes dixitales. La importancia de cuntar con bones ferramientes tecnolóxiques tamién se punxo de manifiestu por aciu la xestión de los espedientes de regulación temporal d’empléu (ERTE), les ayudes a autónomos, les preinscripciones d’alumnos pal cursu escolar o les ayudes a los sectores en crisis.
D’equí p’arriba, y pa siguir avanzando nestos propósitos, les principales llinies estratéxiques son les siguientes:
- Desenvolver una plataforma dixital de servicios de l’Alministración que seya accesible con facilidá y dende cualquier llugar.
- Analizar les soluciones dende’l puntu de vista de los usuarios y facer énfasis na funcionalidá pa llograr mayor satisfación y eficiencia.
- Incrementar la excelencia operativa: llograr un mayor rendimientu de la organización al traviés de les ferramientes desenvueltes.
- Desenvolvimientu de la capacitación de los recursos tecnolóxicos y la capacitación interna.
- Innovación: va trabayase coles mires de llograr servicios innovadores que superen les espectatives de los usuarios.
- Desenvolver una arquitectura de bases de datos que faiga posible l’usu de los mesmos de forma eficiente y permita una mayor adaptación de los servicios a los usuarios, la xeneración de nueves prestaciones y más eficiencia.
- Estandarización y modernización: va tratar de homoxeneizar distintos perfiles de soluciones pa llograr mayor eficiencia nos caltenimientos.
