La Conseyería de Cultura, Política Llingüística y Turismu va aumentar el so presupuestu pa 2021 cerca d’un 27% en comparanza col d’anguaño, lo que va xubir los recursos pa toles sos competencies. El proyectu va permitir empecipiar el plan de reconstrucción de la estación d’iviernu de Payares, abordar intervenciones nel prerrománicu y nel Camín de Santiagu, financiar la creación del observatoriu turísticu y promover la demanda interior, mesmo qu’avanzar nel afitamientu de la Rede de Normalización Llingüística.
La conseyera de Cultura, Berta Piñán, señaló mientres la so intervención na Xunta Xeneral que les cuentes del so departamentu, que xuben a 59.956.572 euros, son “una provisión ambiciosa que recueye munches iniciatives básiques para sentar les bases de la política cultural, llingüística, deportiva y turística de los próximos años”. Dalgunes de les llinies de trabayu son:
Turismu intelixente y planes de sostenibilidá
En materia de Turismu, la conseyería va destinar 250.000 euros a la puesta en marcha d’un sistema d’intelixencia pa optimizar la xestión d’Asturies como destín, al tiempu que se va facilitar la concurrencia nel proyectu de tolos axentes implicaos. La partida de subvenciones a entidaes llocales pal desenvolvimientu de destinos intelixentes va crecer hasta los 200.000 euros, al igual que la destinada a la digitalización y modernización de pymes.
Coles mesmes, la Viceconseyería de Turismu va destinar 500.000 euros a promocionar la demanda interior por aciu d’un programa de bonos de descuentu pa residentes na comunidá. Amás, va dedicar 240.000 euros a recrear el programa Asturies a lo grande, una ferramienta p’afitar la creación, comercialización y consumu de productu turísticu fuera de temporada.
Tamién se van invertir 1.100.000 euros nos Planes de Sostenibilidá Turística d’Onís y de Somiedu, lo que ratifica l’apueste pol ociu de naturaleza y rural. El programa de coordinación y promoción de turismu suma 12.273.440 euros, casi un 19% más qu’anguaño.
Per otru llau, xube’l gastu en campañes de promoción hasta los 3.620.000 euros, coles mires de recuperar la inversión y asitiar Asturies como destín internacional venceyáu al Camín de Santiago.
Trés grandes exes culturales
El presupuestu pa promoción cultural ye de 20.657.390 euros, cerca d’un 17% más qu’en 2020. Piñán anuncio que’l so departamentu va facer un apueste claru por trés grandes exes:
- La promoción de la cultura per tol territoriu asturianu, sobre manera na zona rural.
- La busca de la profesionalización y dignificación de les condiciones de trabayu del mundu cultural.
- La participación afayadiza d’Asturies n’eventos grandes, como’l Xacobéu 21, too ello de la mano del sector y de los equipamientos del Gobiernu del Principáu.
D’esta manera, van destinase 778.650 euros a la convocatoria de los seis circuitos culturales existentes: artes escéniques, música, lliteratura, difusión de la cultura tradicional, artes plástiques y cine, nos que se prioriza la participación de conceyos pequeños y medianos. La cofinanciación del Principáu algama’l 90% de los costes de programación nos conceyos de menos población.
Coles mesmes, Cultura va crear en 2021 una nueva llinia de sovenciones pa proyectos culturales singulares que se desenvuelvan de manera prioritaria nel ámbitu rural, a los que va destinar 300.000 euros. Tamién contempla una partida de 450.000 pa la programación del Xacobéu 21.
600.000 euros pa monumentos prerrománicos
El presupuestu de patrimoniu cultural xube un 33,44%. El proyectu inclúi intervenciones de caltenimientu y espardimientu d’elementos del Patrimoniu Mundial asturianu. Asina, destina 600.000 euros pal prerrománicu, que se van distribuyir n’actuaciones centraes en Santullano, Santa María del Naranco, San Miguel de Lliño y la Foncalada. Coles mesmes, van invertise 200.000 euros n’una nueva llinia d’ayudes a los conceyos pa iguar el Camín de Santiago.
Amás, van destinase 115.00 euros pa l’apertura de la cueva de Candamu y pal arreglu de los accesos a El Pozu’l Ramu.
Tamién s’inclúi una partida importante, de 150.000 euros, empobinada a meyores nos castros de Cuaña y Mouguías.
Normalización Llingüística
Tocante a Política Llingüística, el proyectu presupuestariu inclúi partíes pa los servicios de normalización abiertos nes corporaciones llocales o mancomunidaes, mesmo que fundaciones de calter públicu pa la mesma función. Estos servicios van vese sofitaos al dotase con recursos p’actividaes en materia d’educación y cultura que, a un tiempu, refuercen la puesta en marcha de la Rede de Normalización Llingüística, na que trabaya’l Principáu.
El presupuestu previstu nesti programa ye de 2.077.271 euros, lo que supón una xuba del 9,1% al respective d’esti añu.
Instalaciones deportives
La conseyera de Cultura repitió la relevancia del proyectu de reconstrucción de la estación de Payares como motor económicu del valle de Ḷḷena. Los presupuestos acuten 5 millones pa entamar unos trabayos que se van desenvolver a lo llargo de trés años.
El proyectu presupuestariu tamién prevé 7.348.459 euros pal caltenimientu y meyora de les instalaciones deportives. Ente eses actuaciones figuren la construcción de nuevu pavimentu nel polideportivu Juan Carlos Beiro, el cambéu de verde artificial del campu de fútbol d’El Cristo o’l proyectu de reconversión enerxética pal autoconsumu sostenible con enerxíes renovables del refuxu de Brañagallones, nel Parque Nacional de los Picos d’Europa.
Piñán destacó la creación d’una nueva llinia de sovenciones destinada a conceyos de menos de 10.000 habitantes pa meyores n’instalaciones deportives y l’apueste pola promoción de l’actividá física con llinies de sovención y financiación qu’algamen, en total, cerca de 2.000.000 d’euros.
