El Gobiernu d’Asturies otorga nel Premiu José Lorca nel so XlV edición a Carlos Becedóniz, pola so trayectoria en defensa de los derechos de los menores. El que exdirector del Institutu Asturianu para l’Atención Integral a la Infancia y a les Families llogró’l sofitu unánime de los miembros del xuráu. El galardón entregaráse’l próximu 16 d’avientu.
Carlos Becedóniz llicenciáu n’Historia na Universidá d’Uviéu en 1980, tuvo tola so carrera profesional inclinada hacia la defensa y promoción de los derechos de neños, neñes y adolescentes d’Asturies. La so trayectoria llaboral empezó en 1984 como educador nel centru de reforma de menores de Sograndio y siguió colos mesmos llabores nel equipu técnicu de centros del área del menor, onde exerció como xefe de 1993 a 1995.
Tamién trabayó como técnicu na Dirección del Serviciu d’Infancia, Familia y Adolescencia del Institutu Asturianu d’Atención Social a la Infancia, Families y Adolescencia. De 2006 a 2019 foi promotor y coordinador del Observatoriu de la Infancia y l’Adolescencia y dende setiembre de 2019 hasta la so xubilación, en mayu d’esti añu, dirixió l’Institutu Asturianu para l’Atención Integral a la Infancia y a les Families, dependiente de la Conseyería de Derechos Sociales y Bienestar.
Los miembros del xuráu valoraron la so trayectoria impecable en favor de los derechos d’infancia y l’adolescencia y destacaron el so compromisu y vocación de serviciu.
El Premiu José Lorca, creáu en memoria del fiscal de menores del Tribunal Superior de Xusticia d’Asturies fináu en 2005, reconoz el llabor de persones que destaquen de forma especial pola so contribución a la prevención, promoción, atención, defensa y espardimientu de los derechos de la infancia.
