El Gobiernu d’Asturies plantegó güei adaptar les frecuencies y amenorgar los horarios de xubida de los autobuses del plan de tresporte a llagos de Cuadonga. Responsables y técnicos de la Conseyería de Fomentu, Cooperación Local y Prevención de Quemes, el Conceyu de Cangues d’Onís, la Dirección Xeneral de Tráficu (DXT) y l’empresa concesionaria caltuvieron una xunta telemática p’avanzar nes midíes empuestes a menguar la intensidá de tráficu na carretera d’accesu al espaciu natural.
La propuesta del Gobiernu d’Asturies recueye un amenorgamientu del horariu de xubida d’autobuses, de forma que la postrera salida dende Cangues d’Onís se faiga a les 17:00 hores. Esto supondría adelantrar en dos hores l’últimu viaxe d’ida, qu’anguaño se realiza a les 19:00.
Tamién s’encetó la reorganización de les frecuencies, que pasa por potenciar la vienta antemanada de billetes col fin d’adaptar al máximu’l númberu de trayectos. L’oxetivu ye llograr, de manera progresiva, qu’el 100% de los boletos viéndanse primeramente.
Estes nueves midíes, que se sumaríen a les alcordaes la pasada selmana, van dexar siguir avanzando na meyora de la organización y redistribución de l’arribación de visitantes al espaciu natural y nel amenorgamientu d’intensidá de tráficu y de les cruces ente vehículos de tresporte de viaxeros.
Amás, el zarru de la carretera a automóviles ensin autorizar, seyan coches o autocaravanes, mientres les 24 hores del día mientres tea vixente’l plan especial de tresporte, va entrar a valir a lo llargo de la próxima selmana. Fomentu informó de que, nel marcu del plan vixente, va habilitase un serviciu a primer hora de la mañana pa facilitar l’accesu a esti espaciu protexíu a determinaos colectivos, como los montañeros federaos.
Tamién ta en marcha’l trabayu de revisión refechu de los procedimientos y llistaos de vehículos autorizaos pa evitar un usu desaparente, una iniciativa que desenvuelve la Dirección Xeneral de Tráficu al traviés d’un procesu de digitalización, información, vixilancia y control empecipiáu en xineru.
Amás, el Gobiernu d’Asturies dio cuenta del trabayu realizáu pa enllantar meyores inmediates nesta vía. Tres la visita de campu del pasáu llunes, trabáyase nel documentu técnicu pa l’adecuación de diez zones d’encruz, cola habilitación de sobreanchos adicionales a la plataforma actual, d’ente 1,5 y 2 metros, y llargores d’ente 16 y 32 metros, que faciliten l’encruz de vehículos. Dos d’estes zones, les asitiaes nel mirador de la Reina y nel altu de Teón, van dexar, de la mesma, realizar cambeos de sentíu en casos d’emerxencia o evacuación.
Nel alcuentru tamién s’encetó la necesidá de reparar cantos y cunetes de calzada y de llevar a cabu la roza y fradadura selectiva de determinaes zones onde la vía tien un anchu abondu. Coles mesmes, van realizase actuaciones de señalización ya información.
A lo último, y complementariamente a toes estes midíes, van reforzase los servicios d’atención al públicu y de vixilancia del Parque Nacional de los Picos d’Europa, tanto pa informar como pa garantizar el cumplimientu de les restricciones d’accesu a los vehículos ensin autorizar.
