El conseyeru de Mediu Rural y Cohesión Territorial, Alejandro Calvo, presentó güei a los alcaldes y alcaldeses d’Uviéu, Xixón, Avilés y Siero los proyectos de movilidá sostenible, segura y conectada en redolaes urbanes a los que se van destinar los 19.323.293 euros qu’Asturies va recibir del Plan de Recuperación, Tresformamientu y Resiliencia del Gobiernu d’España y que van dexar avanzar na Estratexa de Movilidá Sostenible.
Anque les actuaciones van centrase nestos cuatro conceyos, los más poblaos de la comunidá, dalgunes tienen calter supramunicial, como’l programa de fomentu del tresporte públicu, dotáu con más de 7,5 millones, col que se van habilitar carriles específicos p’autobuses y va dase prioridá semafórica a estos vehículos de tresporte colectivu n’Uviéu, Xixón, Siero y les contornes d’Avilés, Nalón y Caudal.
Otru de los proyectos incluyíos na estratexa ye la meyora de la movilidá piatonal y del tráficu nos accesos al Hospital Universitariu Central d’Asturies (HUCA), dotada con 2,4 millones. N’Uviéu tamién se va construyir una pasarela piatonal que va conectar les estaciones de ferrocarril y autobús, con un presupuestu de 2 millones.
En Xixón plantéguense dos programa específicos. El primeru, dotáu con daqué más de 2,1 millones, consiste na creación d’un intercambiador nel centru de la ciudá, que va dexar a los usuarios alternar l’usu de los servicios urbanos ya interurbanos con seguridá y nun únicu espaciu. Tamién se va construyir un aparcamientu disuasoriu pa turismos na avenida de Portugal, con un costu llixeramente cimeru a los 2 millones.
N’Avilés plantégase la construcción de dos intercambiadores urbanos nel Parque del Muelle y el Parque de les Meanes, con una inversión averada de 2 millones.
Pela so parte, en Siero crearáse una sienda piatonal y ciclista ente Llugones y La Fresneda, un proyectu que va fomentar la movilidá non motorizada y que dispon d’un presupuestu de 2,5 millones.
Proyectos d’ámbitu comarcal
Primeramente, les actuaciones previstes pol Ministeriu de Tresportes, Movilidá y Axenda Urbana taben destinaes a conceyos de más 50.000 habitantes. Sicasí, el Principáu pudo incorporar a más conceyos, polos que les midíes empobinaes a la meyora de la movilidá sostenible van repercutir nes zones urbanes con mayores problemes de conxestión y contaminación. D’esta miente, amás de facilitar el tráficu de los autobuses, tamién se plantega la construcción de intercambiadores urbanos en toes estes árees.
Coles mesmes, va poner en marcha un plan para digitalizar los servicios de tresporte públicu, lo que va dexar al Consorciu de Tresportes d’Asturies (CTA) avanzar nel procesu de modernización.
Per otru llau, el Principáu tamién va impulsar un nuevu programa de movilidá sostenible. Nesti sentíu, va realizar un importante esfuerzu p’amontar la ufierta de tresporte públicu nes zones rurales, afaer les sos frecuencies a les demandes vecinales y favorecer l’accesu a la información de los usuarios. Esta midida pretende ameyorar la calidá de vida nel mediu rural, facilitando a la población l’accesu a servicios sanitarios, asistenciales y educativos. Pa ello, van aprovechar al máximu los recursos que yá esisten, baltes como les rutes de tresporte escolar, y van optimizase y van ampliar los servicios actuales. Na mesma llinia, va fomentase la collaboración institucional y alministrativa.
El CTA dispon d’una importante rede de tresporte públicu qu’atiende 423 itinerarios de servicios d’usu xeneral, lo qu’implica 704.975 espediciones y 18,7 millones de kilómetros al añu. Estos servicios complementáronse por aciu la integración de bona parte de les rutes de tresporte escolar, favoreciendo l’usu compartíu por escolares y residentes de les zones rurales. D’esta miente, a los servicios d’usu xeneral añediéronse otres 939 rutes que suman 338.221 percorríos añales.
