Mediu centenar de conceyos xuniéronse al proxecto Conceyos con Ciencia, una iniciativa del Gobiernu d’Asturies que tien por oxetu averar la divulgación científica y la innovación al territoriu, especialmente a la zona rural. Esti programa, que ta dando los primeros pasos, pretende favorecer les vocaciones científiques ente l’alumnáu, romper coles fiendes xeográfiques, culturales y de xéneru, y averar el conocimientu a la ciudadanía.
Avilés foi la sede del primer alcuentru de la rede, nel que participaron representantes municipales de 25 conceyos, ente ellos, una decena d’alcaldes y alcaldeses, amás de conceyales y técnicos, y que tuvo presidida pol conseyeru de Ciencia, Innovación y Universidá, Borja Sánchez, y l’alcaldesa d’Avilés, Mariví Monteserín.
Con esti proyectu, Ciencia apuesta por convertir los Centros de Dinamización Tecnolóxica Local (CDTL) en llaboratorios d’innovación social, fomentar la ciencia ciudadana y “desestacionalizar” la divulgación científica. Nesti sentíu, Borja Sánchez comprometióse a favorecer qu’exista una ufierta d’actividaes venceyaes a la I+D+i a lo llargo del añu per tola xeografía rexonal, más allá d’ocasiones puntuales como la Selmana de la Ciencia y el Día de la Muyer y la Neña na Ciencia.
Amás del conseyeru y l’alcaldesa d’Avilés, ún de los primeros conceyos en sumase a la iniciativa, nel actu intervieno tamién el director xeneral d’Innovación, Iván Aitor Lucas, pa esponer los principios d’esta iniciativa y dalgunes de les convocatories que pueden sofitar el so funcionamientu.
Les primeres esperiencies yá se celebraron alredor a la Selmana de la Ciencia, al traviés de la collaboración cola Universidá d’Uviéu, el Conseyu Superior d’Investigaciones Científiques (CSIC), el Serviciu Rexonal d’Investigación y Desenvolvimientu Agroalimentariu (Serida), el Muséu Xurásicu d’Asturies (Muxa) o Llaboral Cinemateca; propuestes preparaes polos CDTL ya iniciatives privaes d’asociaciones o empreses que cunten con subvención pública.
D’esta forma, consiguióse poner en marcha la I Selmana de la Ciencia en dellos conceyos y reforzar la programación n’otros. Conferencies, talleres, esposiciones, cine científicu, un hackathon d’emprendimientu xuvenil o un xuegu de mesa sobre científiques son dalgunes de les actividaes que llegaron a centros escolares y a la población xeneral.
La Conseyería de Ciencia va roblar llueu un conveniu de collaboración cola Federación Asturiana de Conceyos FACC) pa constituyir oficialmente la rede con tolos conceyos que participen nel programa y aquellos que deseyen incorporase.
