La Conseyería de Derechos Sociales y Bientar ufiertó la so collaboración absoluta a la Fiscalía pa reforzar el control de toles residencies de mayores. Con esi propósitu, la conseyería va facilitar al ministeriu públicu la información de la que disponen los sos servicios d’inspección sobre la situación epidemiolóxica nos centros, tanto públicos como privaos.
La Fiscalía Superior del Principáu ta analizando la situación de les residencies coles mires d’axuntar la información necesaria pa conocer l’impactu del coronavirus, amás d’aquelles circunstancies asistenciales que puedan suponer riesgos pa les persones residentes y les plantiyes. Nuna nota pública, la Fiscalía ufiertó la so collaboración al Executivu autonómicu. Esa ye tamién la disposición del Gobiernu d’Asturies, que va cooperar en too aquello que precise’l ministeriu públicu pa garantizar la seguranza y lluchar contra’l virus.
Ello ye que la Conseyería de Derechos Sociales yá empezó’l 19 de marzu un sistema d’intercambéu d’información colos centros privaos -que yá se venía faciendo con aquellos xestionaos dende la rede pública del ERA- pa conocer de primer mano y d’una manera áxil y cenciella la situación diaria de cada residencia. L’oxetivu prioritariu ye velar pola seguranza y calidá de l’atención de les persones mayores y de los profesionales, planiar posibles midíes de refuerzu y canalizar les demandes de material o otros pidimientos.
La llexislación aprobada por mor del estáu d’alarma obliga a llevar un control de tolos centros residenciales públicos y privaos pola Conseyería de Salú y de toles autoridaes competentes. Esti sistema, amás de llograr que la información seya uniforme, periódica y sistemática, tien en cuenta la situación tan delicada y la presión a la que s’enfrenten les direcciones d’estos centros, a les que se da soporte, información y sofitu. “Queremos facilita-yos el llabor nestos momentos duros y poner a disposición tanto de les persones mayores como de los equipos profesionales, tolos recursos que tean al nuestru algame, pa frenar l’avance del coronavirus nuevu”, afirmó la conseyera de Servicios Sociales, Melania Álvarez.
