El Principáu conmemoró’l Día Internacional de les Biblioteques, que se celebró ayeri, cola apertura d’una esposición sobre la figura del gran compositor y lletrista de musicales Stephen Sondheim, fináu fai agora un añu. La conseyera de Cultura, Política Llingüística y Turismu, Berta Piñán, inauguró la retrospectiva, que foi posible gracies al legáu qu’en 2019 donó Iñigo Santamaría a la Biblioteca d’Asturies Ramón Pérez de Ayala. La colección constitúi unu de los cuerpos documentales sobre teatru musical más completos del país.
Familiares d’Iñigo Santamaría allegaron al actu d’inauguración xuntu col director xeneral de Cultura y Patrimoniu, Pablo León, y el director de la Biblioteca d’Asturies, Juan Miguel Menéndez Llana. L’amuesa, comisariada por Sara Pérez y coordinada por Armando Alonso, va poder visitase hasta’l 27 de payares de manera gratuita.
Berta Piñán estimó a la familia de Santamaría l’arrogancia amosada al depositar unos fondos que s’atopen al algame d’investigadores y especialistes, quien hasta agora nun disponíen d’una biblioteca especializada nesti ámbitu. Amás, destacó que la esposición nun ye solo una forma d’homenaxar a Sondheim, sinón tamién a toles persones que altruistamente donen les sos colecciones y fueron construyendo una “biblioteca de biblioteques”.
El legáu d’Iñigo Santamaría forma xuna de les mayores biblioteques venceyaes al ámbitu del teatru musical n’España. Esta compilación, especializada na música escénica, toma tou tipu de fontes: musicales, visuales, audiovisuales, lliteraries y orales. Toes elles fueron arrexuntaes a lo llargo de la vida de Santamaría y del so compañeru, el diseñador gráficu Xavier Martínez.
L’amuesa Stephen Sondheim, el padre del teatru musical modernu: legado Íñigo Santamaría inclúi grabaciones sonores de los espectáculos, imaxes de vídeu, llibros sobre’l compositor, folletos de mano, llibretos, partitures, crítiques periodístiques, billetes d’entrada, taces, imanes y otros productos de comercialización.
Discípulu de Leonard Berstein, Sondheim foi unu de los grandes nomes del teatru musical del sieglu XX y tuvo una esitosa carrera qu’incluyó la reconocencia de siete premios Tony y un Oscar.
