Casi 300 candidatos superaron les pruebes selectives pa la ellaboración de les bolses de trabayu de les subescalas de Secretaría y de Secretaría-Intervención, convocaes pola Conseyería de Presidencia, al traviés del Institutu Asturianu d’Alministración Pública.
Nel casu de les places pa Secretaría, la bolsa d’empléu temporal queda formada por 144 persones (presentáronse 198 a les pruebes) y 142 van integrar la d’Intervención (aspiraron 154).
La midida respuende a la necesidá de cubrir estos perfiles profesionales en determinaos momentos nos conceyos, una situación que complica’l funcionamientu de les alministraciones locales y repercute na prestación de los servicios públicos municipales.
Les bolses de trabayu van dexar al Principáu cuntar per primer vegada con un procesu de llamamientu para cubrir les vacantes de forma axilosa y eficaz, al empar que se van evitar costos económicos y alministrativos, cuidao que la tramitación va realizase directamente dende la Dirección Xeneral d’Alministración Local.
Amás, en mayu ta prevista tamién una convocatoria de prueba selectiva para la ellaboración d’una bolsa de trabayu pa la subescala d’Intervención-Tesorería.
El procedimientu pa cubrir les vacantes combina una xestión axilosa y tresparente col máximu respetu a les garantíes alministratives. Asina, una vegada que se produz una vacante nun puestu de trabayu reserváu a funcionarios d’Alministración local con habilitación de calter nacional, el conceyu correspondiente va solicitar a la Dirección Xeneral d’Alministración Local la publicación de la vacante. Trescurríos diez díes arteros dende la publicación na páxina web del Principáu, si nun se produz nenguna solicitú per parte de funcionarios de carrera d’Alministración local con habilitación nacional, el consistoriu va poder solicitar el nomamientu d’un funcionariu interín.
Nel supuestu de que la entidá local nun disponga de bolsa propia, l’alministración municipal va faer una ufierta empobinada en primer llugar –por ser preferentes- a los componentes de la relación de candidatos de la subescala qu’en cada casu correspuenda, unviada pol Ministeriu de Política Territorial y Función Pública.
De nun aceptar nengún candidatu, fadríase una ufierta a los integrantes de les bolses de trabayu d’Asturies, al traviés d’un corréu electrónicu unviáu a cada unu d’ellos colos datos sobro la plaza. El candidatu va disponer de 24 hores p’aceptar la ufierta y, en casu de nun faelo, pasaría al postreru puestu de la llista. Quien acepte la propuesta va recibir un segundu corréu nel que se-y va indicar que dispon de trés díes arteros pa presentar la documentación necesaria énte l’alministración local, que va proponer el nomamientu a la Dirección Xeneral d’Alministración Local.
Esti procedimientu de selección garantiza los principios de publicidá, igualdá, méritu y capacidá y facilita faer frente a la cobertoria – cada vez mayor- de les vacantes que se producen en puestos imprescindibles pal desenvolvimientu de la vida alministrativa municipal.
