El Gobiernu d’Asturies, al traviés de la Dirección Xeneral de Tresportes y Movilidá, va poner en marcha un nuevu programa de movilidá sostenible. Tal y como adelantó’l presidente, Adrián Barbón, nel debate d’orientación política, el Principáu va realizar un importante esfuerciu pa incrementar la ufierta de tresporte públicu nes zones rurales, adaptar les sos frecuencies a les demandes de la población y facilitar l’accesu de los usuarios a la información.

El nuevu programa pretende ameyorar la calidá de vida de los vecinos del mediu rural, facilitando’l so accesu a servicios sanitarios, asistenciales y educativos. Pa ello, va maximizase’l aprovechamientu de los recursos que yá esisten, como les rutes de tresporte escolar, y van ameyorase y ampliase los servicios actuales. Tamién va impulsase la collaboración institucional y alministrativa.

El Consorciu de Tresportes d’Asturies (CTA) dispón anguaño d’una importante rede de tresporte públicu qu’atiende 423 itinerarios de servicios d’usu xeneral, lo que supón realizar 704.975 espediciones y percorrer 18,7 millones de kilómetros al añu.

Los servicios ofrecíos por esta rede compleméntense cola integración de bona parte de les rutes de tresporte escolar, favoreciendo l’usu compartíu por escolares y residentes de zones rurales. D’esti mou, a los servicios d’usu xeneral súmense 939 rutes coles que se realicen 338.221 percorríos anuales.

El proyectu de movilidá rural y cohesión territorial del Gobiernu d’Asturies va reforzar esta ufierta p’atender la elevada dispersión de la población y facilitar l’accesu al tresporte públicu de tolos habitantes, contribuindo a fixar población nel mediu rural.