El Principáu enfótase en que l’Institutu d’Investigación en Biodiversidá estimule’l campus de Mieres

La Conseyería de Ciencia, la Universidá d’Uviéu y el CSIC empiecen los trámites pa firmar el conveniu que va regular el centru

0
563
El Principáu enfótase en que l'Institutu d'Investigación en Biodiversidá estimule'l campus de Mieres

El Gobiernu asturianu cunta dar un impulsu a l’actividá científica nel campus de Mieres al traviés de la tresformación de la Unidá d’Investigación en Biodiversidá nun institutu mistu de la Universidá d’Uviéu y el Conseyu Superior d’Investigaciones Científiques (CSIC). El conseyeru de Ciencia, Innovación y Universidá, Borja Sánchez, amosó esti martes el so enfotu en qu’esti institutu valga d’estímulu pal campus. Va seguise’l modelu d’otres entidaes asemeyaes, como’l Centru d’Investigación en Nanomateriales y Nanotecnoloxía (CINN), cola consiguiente medría de personal investigador y recursos.

El titular de Ciencia reunióse cola delegada del CSIC n’Asturies, Ángeles Gómez Borrego, y col vicerrector d’Investigación de la Universidá d’Uviéu, José Ramón Obeso, pa tratar la firma del conveniu que va tresformar l’actual unidá investigadora n’institutu, y la posibilidá de xubir el financiamientu del Principáu al centru siempre qu’exista disponibilidá presupuestaria. L’alcuerdu que va facer efectivu’l procesu pa que’l centru empiece a operar como Institutu Mistu d’Investigación en Biodiversidá (IMIB) va firmase, previsiblemente, en payares. «La idea ye qu’esti centru s’espanda nel campus de Mieres, lo que significa más investigadores, más proyectos y más personal en práctiques», indicó Sánchez.

Anguaño, una ventena d’investigadores desenvuelve’l so trabayu na unidá mista, anque la plantiya podría aumentar con más científicos, pero tamién con estudiantes que desenvuelvan trabayos de fin de grau (TFG) y trabayos de fin de máster (TFM), y mocedá de doctoráu. L’apueste por xubir a rangu d’institutu esta unidá -una actuación anunciada pol ministru de Ciencia, Innovación y Universidaes, Pedro Duque, na so visita a Asturies- supón “potenciar l’actividá conxunta que desenvuelven la Universidá d’Uviéu y el CSIC y va ayudar a captar y retener talentu”, precisó’l conseyeru.