El Gobiernu d’Asturies empecipió güei les obres de la meyora integral de les viviendes públiques de la cai Xuacu de Sama, nel barriu uvieín de La Corredoria, que cunten con una inversión de más de 2,4 millones y un plazu d’execución de catorce meses.
La reforma consiste nel allugamientu d’una fachada con aislamientu térmicu, la renovación de les ventanes y la instalación d’un sistema de renovación del aire que favorez una meyor temperatura nos llares. El sistema de ventilación de doble fluxu con recuperación de calor garantiza que l’aire interior de les viviendes tenga una temperatura constante y afayadiza. Amás, van cerrase tolos tendales de los pisos pa incorporalos a la superficie interior, yá que anguaño atópense fuera de la llinia envolvente de la fachada.
La conseyera de Derechos Sociales y Bienestar, Melania Álvarez, y el director xeneral de Vivienda, Fermín Bravo, visitaron güei l’entamu de los trabayos, que van permitir ameyorar de forma notable’l confort en tolos llares y amenorgar los consumos.
“Actuaciones como esta son exemplu del apueste d’esti Gobiernu poles persones y pol impulsu de la eficiencia enerxética pa llograr un mayor confort y amenorgar el consumu nos llares”, sorrayó álvarez.
Amás, anunció que la partida de vivienda va aumentar más d’un 7% en 2022. “El presupuestu va dexanos caltener les ayudes al arriendu, ameyorar el parque inmobiliariu y promover la eficiencia enerxética”, añedió.
