El Gobiernu d’Asturies entama una esposición itinerante sobre la Reserva de la Biosfera de Picos d’Europa qu’axunta fotografíes históriques y actuales de los paisaxes, localidaes y construcciones del parque nacional. El director xeneral del Mediu Natural y Planificación Rural, David Villar, visitó güei la Casa la Cultura de Cangues d’Onís, onde va esibise esti material hasta’l 31 de marzu.
La muestra va recalar darréu nel restu de conceyos incluyíos na reserva: Amieva, Onís, El Valle Baxu de Peñamellera, El Valle Altu de Peñamellera y tamién Potes, en Cantabria. Súmase asina a los conceyos de Cabrales y Posada de Valdeón, en Castiella y Llión, onde s’espunxo l’añu pasáu.
L’acción enmárcase nes actividaes promovíes pol comité español del Programa Hombre y Biosfera (Programa MaB) con cuenta del cincuenta aniversariu d’esta iniciativa de la Unesco. Trátase de l’acción científica intergubernamental más ambiciosa d’esti organismu.
L’oxetivu del programa MaB ye identificar les árees naturales nes que resulta prioritariu harmonizar el caltenimientu de la diversidá biolóxica y cultural col desenvolvimientu económicu y social de los espacios.
Picos d’Europa participa nesta iniciativa en calidá de reserva de la biosfera, un títulu qu’ostenta dende’l 2003. Esti espaciu caltién una puxante actividá ganadera y pastoril, que se caltién nos aprovechamientos de les camperes de les mayaes y puertos y na producción de dalgunos de los más apreciaos quesos artesanos españoles, como’l Cabrales, el Gamonéu, el Picón Bejes-Tresviso, el Valdeón, el Beyos, el Peñamellera o los quesucos de Liébana.
