La Conseyería d’Infraestructures, Mediu Ambiente y Cambéu Climáticu va invertir alredor de 1,2 millones nes 14 carreteres afectaes pol últimu temporal. Esta cantidá súmase a los 970.745 euros que yá se tán executando pa reparar otros 14 fundimientos rexistraos pola mesma causa na selmana del 23 d’ochobre. La directora xeneral d’Infraestructures, Esther Díaz, facilitó esti martes estos datos na so visita al fundimientu de la carretera AS-257 que xune Colunga y Llastres. Díaz destacó’l «enorme esfuerzu presupuestariu que tamos realizando dende’l Principáu pa llevar a cabu les obres lo primero posible».
L’arreglu d’esti tramu, que s’efectúa por trámite d’emerxencia, va ser el de mayor costu, con una cuantía inicial envalorada alredor a los 400.000 euros. Los trabayos empezaron güei mesmo col entamu de les prospecciones necesaries pa determinar la fondura del movimientu de tierres y de cimentación del muriu de formigón con carriles fincaos, que se va construyir en tol llargor afectáu. Amás, mientres les obres abrirá un carril de tráficu alternativu reguláu con semáforos, nel momentu que les condiciones de seguridá y execución lo pemitan, porque somos conscientes de los trestornos que produz el zarru de la vía”, esplicó.
Díaz, que destacó «la importancia de la vía pa los pescadores na temporada de pesca la xarda», añedió que ta previsto que la obra termine a finales d’avientu o a principios del próximu añu. L’ultimu temporal saldóse con 69 incidencies en carreteres de la rede autonómica, causaes por cayida d’árboles, desprendimientos, deslizamientos, fundimientos, argayos y soterramientos d’obres de fábrica. Gran parte d’elles fueron iguaes con medios propios del Principáu.
Anguaño, cuatro carreteres de la rede autonómica siguen cortaes: AS257; AS-387, que xune L’Entregu con El Condao (puntu kilométricu 7,5); AS-347 Pravia-Curniana (puntu kilométricu –PK- 10,750), y SI Candín-La Camperona (PK 0,240), que s’atopa n’obres por daños mientres la envernada d’ochobre. El restu de les víes afectaes son: PI-10 Borines-Sieres, por un argayu nel PK 0,900; AS-337 (P.K 3,500) por fundimientu de la plataforma; AS 386 (PK 1,200 y 1 al 3,000), por desprendimientu; AS-231 (PK 10,700) por fundimientu de media calzada; AE-3 (PK 4 y 6) por desprendimientu; RI-6 (PK 2,850, 4 y 6,130) por corte de calzada y desprendimientu; RI-2 (PK 3) por desprendimientu; AS 370 Salas-Soutu los Infantes y AS-15 en Soutu los Infantes, por arrastres; AS-15 Curniana-Puertu de Cerrados; AS-29 Santantolín-La Riegla (PK 4,800 y 31,200) y AS 210, con dellos puntos kilométricos tamién por cayida d’árboles y argayos asociaos; AS-14 Grandas de Salime- La Ponte del Infiernu (PK 0,500 al 5 y 40,800), por fundimientu, árboles y argayos asociaos.
