La Conseyería de Ciencia, Innovación y Universidá punxo güei en marcha’l programa Drive test, que va midir la calidá de la conectividá de telefonía móvil n’Asturies. Un vehículu ECO, que garantiza les baxes emisiones, va percorrer 6.365 quilómetros a lo llargo de 541 carreteres nacionales, rexonales, comarcales y locales pa conocer la cobertura de la rede de los principales operadores nel Principáu.
L’oxetivu d’esti programa ye conocer con precisión la calidá de les telecomunicaciones na comunidá, sobre manera na zona rural. El procedimientu ye asemeyáu al qu’emplega Google pa mapear el territoriu. Mientres aproximao cuatro meses, un vehículu —o más, según considere la empresa axudicataria— va circular pela rede de carreteres con dispositivos de tolos operadores de telefonía móvil con rede propia y toles tecnoloxíes esistentes: 2G, 3G, 4G y 5G.
La empresa Eurocontrol resultó axudicataria del proyectu promovíu pol organismu Xestión d’Infraestructures Públiques de Telecomunicaciones del Principáu (Xitpa). El vehículu ta dotáu con equipamientu técnicu d’última xeneración, qu’incluye un escáner de radiofrecuencia y terminales móviles.
La evaluación va realizase dende la esperiencia d’un usuariu, esto ye, les midíes y comprobaciones van ser executaes por persones con dispositivos móviles reales. La información va recoyese al traviés d’un software específicu que va facilitar l’análisis al traviés de la representación en soportes cartográficos. Los primeros resultaos, desque se procesen tolos datos, van tenese primero del branu próximu.
En cada localidá pela que pase’l vehículu va midise la cobertura móvil pa llamaes, la velocidá de xubida y baxada de datos y la calidá de los servicios de navegación per internet. Amás, por cada rede d’operador, va comprobase tamién l’accesu a les páxines web qu’ocupen los principales puestos en visites: Google, Facebook, Twitter y Youtube.
El conseyeru de Ciencia, Innovación y Universidá, Borja Sánchez, destacó la importancia de cuntar con un mapa real de la rede de telefonía móvil, «que va dexar conocer sobre’l terrén ónde hai qu’actuar y qué fórmules emplegar p’ameyorar la conectividá, sobre manera nes zones rurales y más alloñaes».
El proyectu enmárcase na Estratexa de Tresformamientu Dixital na que trabaya la Dirección Xeneral d’Innovación, que tien como oxetivu afitar o afaer planes estratéxicos en zones con deficiente cobertura y que les compañíes conozan les necesidaes del territoriu, de cara a asitiase y ufiertar servicios. Amás, va sirvir pa que la ciudadanía conoza la calidá de la conectividá real qu’existe na so zona.
