El Gobiernu d’Asturies llanza una campaña de Navidá pa promocionar la marca calidable Alimentos del Paraísu qu’incorpora tantu productos frescos: carnes, pexes, frutes y miel, como ellaboraos: quesos, conserves, repostería o platos preparaos.
El sellu creció de manera bien significativa nos últimos años y va caltener esti enclín en 2022, cola incorporación de nuevos productos, como la güerta asturiana y los ellaboraos cárnicos. Tamién se va siguir ampliando la rede de comercios acoyíos al distintivu fora d’Asturies y van buscase nuevos socios estratéxicos pa impulsar la marca nel sector de la hostelería y la restauración.
Alimentos del Paraísu apigura anguaño a más de 340 ellaboradores que representen más del 50% de la industria agroalimentaria rexonal. Quepe destacar que, dientro de la marca calidable, hai 76 queseríes del total de 98 qu’esisten n’Asturies.
La nueva campaña complementa les acciones llevaes a cabu anguaño. Amás de los oxetivos promocionales, inclúi una reconocencia a toles persones que contribuyeron col so trabayu a que los productos agroalimentarios sían más valoraos per parte de el consumidores. Pa ello, van espublizase imaxes y un video promocional que remembren la esencia del mediu rural asturianu fundiendo paisaxe, tradición y productos. Tamién se va editar un calendariu con semeyes esclusives qu’identifiquen y realcen los Alimentos del Paraísu.
Otres de les novedaes va ser la renovación de la páxina web de la marca, por aciu una completa revisión estética y funcional p’ameyorar la esperiencia del usuariu, con un sistema de busca senciellu y prácticu, y que va dar más protagonismu al conteníu gráfico y multimedia. Coles mesmes, va poner a disposición de los navegantes una ferramienta bien completa p’alcontrar la información de el operadores, lo que va apurrir valor añedíu a la información del portal.
