La Conseyería de Mediu Rural y Cohesión Territorial lliberó güei una cría de foca gris, recoyida por axentes del Mediu Natural el pasáu 4 de xineru na playa de La Cagonera, en Xixón. Personal de les direcciones xenerales del Mediu Natural y Planificación Rural y de Pesca Marítima reintroduccieron l’exemplar na mariña occidental.
La cría de foca, una fema, pesaba casi 9 quilos cuando foi alcontrada y presentaba delles feríes na zona dorsal del pescuezu, deshidratación y debilidá. Nun primer momentu, los cuidaos centráronse en rehidratala y suministra-y antibióticu y vitamines nes instalaciones del Principáu. Darréu, treslladóse al Acuariu de Xixón, onde siguió’l procesu de recuperación. Nesti esti periodu, tuvo sometida a una dieta específica pa favorecer la recuperación de pesu.
Tamién tuvo so supervisión veterinaria y biolóxica diaria y realizáronse-y pruebes de natación cada día pa valorar les sos capacidaes. Amás, recibió alimentu vivu pa reparar el so instintu de caza y ayudar a la so reintroducción nel mediu natural.
Nos próximos díes va caltenese un dispositivu de siguimientu del exemplar per parte de los axentes del Mediu Natural.
Varamientu d’animales marinos
La collaboración ciudadana ye de gran importancia na respuesta énte los varamientos d’animales marinos y de la fauna montesa polo xeneral. Énte una situación asina, tien d’informase a los servicios d’emerxencies. Amás, encamiéntase nun averase al animal, nin tocalu o da-y alimentos, y siguir siempre les instrucciones de la Guardería del Mediu Natural y de les fuerces y cuerpos de seguridá.
Un aspectu clave pa la recuperación de los animales ye’l caltenimientu d’un escrupulosu aislamientu. D’esta miente, coles mires de nun avezalos a la presencia d’humanos, llimítense los contactos a los tratamientos puramente necesarios.
