Rreintroduciéronlu na zona onde lu llocalizaren, siguiendo’l protocolu d’intervención
L’esbardu d’osu cantábricu recoyida por axentes del Mediu Natural cerca de Yernes a primeros d’abril foi reintroducida nel mediu natural nel Paisaxe Protexíu del Picu Caldoveiru. L’exemplar soltóse’l 14 de xunetu na mesma zona onde s’alcontró va cuatro meses, siguiendo’l protocolu d’intervención con osos del cordal Cantábricu.
La vuelta del esbardu a esta contornada, favorable pal so desenvolvimientu, pon fin a la primer parte del procesu. D’equí p’arriba, pa evaluar la so adaptación al mediu, empieza una fase de siguimientu activu pol cuerpu técnicu y los axentes del Mediu Natural de la Conseyería de Mediu Rural y Cohesión Territorial, que van usar tecnoloxía de xeolocalización y monitorización en tiempu real. El dispositivu desplegáu dexa comprobar que l’esbardu ta afaciéndose al sitiu con normalidá.
Nel momentu del rescate, l’esbardu taba deshidratáu y desnutríu. En recibiendo los primeros cuidaos veterinarios, treslladóse a les instalaciones de la Fundación Osu Asturies en Proaza, onde permaneció hasta la so reintroducción. Ellí diéron-y l’atención necesaria pa la so rehabilitación. Nos meses que pasó nesi recintu recibió una alimentación diversificada y adaptada a la que va atopar nel mediu natural. Asina, a lo llargo d’estos meses recuperó pesu hasta algamar los 22 quilos nel momentu de la so reintroducción.
