El Principáu meyora la financiación de la Universidá d’Uviéu hasta’l 2021

El cambéu nel conveniu va dexar compensar de forma antemanada a la institución académica pola pérdiga d’ingresos qu’implica la rebaxa de les tases

0
725
El conseyeru d’Educación y Cultura, Genaro Alonso, y el rector de la Universidá d’Uviéu, Santiago García, en rueda de prensa.
El conseyeru d’Educación y Cultura, Genaro Alonso, y el rector de la Universidá d’Uviéu, Santiago García, en rueda de prensa.

El Gobiernu d’Asturies autorizó esti miércoles la modificación del conveniu soscritu’l 19 d’ochobre del 2017 ente l’Alministración del Principáu y la Universidá d’Uviéu cola mira de determinar un marcu de financiamientu estable pa la institución académica hasta’l 2021. Esti cambéu dexa impulsar un sistema d’anticipos pa compensar la pérdiga d’ingresos que podría derivase de la rebaxa de les matrícules, según informaron güei’l conseyeru d’Educación y Cultura, Genaro Alonso, y el rector de la Universidá d’Uviéu, Santiago García, en rueda de prensa.

Asina, d’acuerdu cola modificación aprobada, la Universidá d’Uviéu va poder recibir de forma antemanada’l 55 % del importe de la compensación pola rebaxa de los precios nel mesmu añu en que se toma’l determín y el 45 % restante nel siguiente, siempre qu’exista abonda consignación presupuestaria.

Según los términos del conveniu inicial, la institución académica nun podía recibir los fondos hasta que se dispunxera de los datos definitivos de matriculación, desque publicaos nel Sistema Integráu d’Información Universitaria (SIIU), lo que podía asoceder un añu depués de que se tomare’l determín de rebaxar los precios.

Esti cambéu ye relevante sobre manera anguaño, porque pal cursu que vien (2019-2020) ta prevista una mengua significativa de les tases universitaries. Los cambeos nel conveniu dexen, amás, concretar y clarificar aspectos técnicos rellacionaos col financiamientu de personal o del plan d’inversiones de la Universidá d’Uviéu.

L’alcuerdu soscritu ente’l Principáu y l’Universidá d’Uviéu, modificáu agora, considérase bien positivu por dambes partes. Per un llau, el financiamientu pa gastos corrientes garantiza estabilidá; per otru, el plan d’inversiones ayuda a cubrir necesidaes de caltenimientu, renovación y modernización d’infraestructures. Amás, la vinculación de parte de los recursos al cumplimientu d’oxetivos, lo que comúnmente se llama contratu programa, ayuda a potenciar la escelencia de la institución académica na formación, la investigación, la innovación, la xestión y la eficiencia.