Calvo, xunto col viceconseyeru d’Infraestructures, Movilidá y Territoriu, Jorge García, presentaron tamién al secretariu d’Estáu’l documentu de prioridaes de l’Alianza poles Infraestructures, el grupu de consensu políticu y social que recueye les demandes p’ameyorar les comunicaciones n’Asturies. La xunta de la mesa de siguimientu d’esti foru va convocase llueu pa dar cuenta de la situación de los distintos proyectos.
El conseyeru de Mediu Rural y Cohesión Territorial, Alejandro Calvo, plantegó güei al secretariu xeneral d’Infraestructures del Ministeriu de Tresportes, Movilidá y Axenda Urbana, Xavier Fortes, l’aplicación de bonificaciones lliniales nel peaxe del Güerna de la AP-66.
En concreto, la propuesta del Principáu supondría que los vehículos pesaos, mesmo los de tipu 1 como los de tipu 2, pasaríen a contar con un descuentu del 40% sobre la tarifa completa dende’l primer viaxe, frente al 30% actual. Pela so parte, los turismos dispondríen d’un descuentu superior al 50% a partir del tercer trayectu n’un mesmu mes.
El titular de Mediu Rural destacó’l clima de collaboración qu’existe ente dambes alministraciones y que facilitó’l treslláu de la propuesta sobre’l Güerna, qu’agora tendrá de regulase al traviés d’un decretu qu’adapte les nueves bonificaciones. Anque queda entá por definir dalguna cuestión de calter técnicu, el conseyeru confía en que los descuentos puedan beneficiar a tolos usuarios que circulen regularmente pela AP-66.
La xunta técnica col equipu del ministeriu permitió revisar la situación de les distintes infraestructures que l’Estáu ta desenvolviendo na comunidá.
Nel ámbitu de les estructures ferroviaries, abordáronse les últimes obres y meyores de les pruebes na variante de Payares, les inversiones del plan d’impulsu a les cercaníes, la integración ferroviaria de Xixón tres l’aprobación de la evaluación ambiental de la estación intermodal, el plan de víes d’Avilés y el soterramientu de Llangréu.
Tamién se repasó l’estáu de les infraestructures viaries que l’Executivu central tien en marcha na comunidá con especial atención a les obres de la segunda calzada y d’emerxencia na autovía del occidente y los trabayos de construcción del tercer carril de l’autopista Y, que xunto’l proyectu del enllaz de Matalablima van permitirr conectar cola autovía minera y l’AS-II.
Nel alcuentru, Alejandro Calvo reclamó al ministeriu que les obres que s’acometen na ponte de La Barrosa de l’autovía A-63 “seyan de verdá d’emerxencia” y que se pongan tolos medios disponibles pa encurtiar plazos y restablecer el tráficu nesta vía.
