El Principáu reabrió al tráficu los cinco tramos de carretera de la rede autonómica que permanecíen cerraos dende’l sábadu por riesgu altu d’ádenes y nos que’l nivel d’alerta baxó yá, hasta’l 2 en cuatro d’ellos y hasta el 1 nel quintu.
Esta mañana yá se reactivara’l serviciu de llimpieza y caltenimientu nestos viales por cuenta de que’l riesgu s’atopa nel nivel 3 o altu, situación que siguió ameyorando a lo llargo del día.
En concreto, atópense en nivel 2 o de prealerta les siguientes carreteres: l’AS-227 ente los kilómetros 42,5 y 50,8 (Somiedu); l’AS-228 ente los kilómetros 35,5 y 38,2 (Teberga); l’AS-112 ente los kilómetros 32,3 y 42,4 (Ayer), y l’AS-117 ente los kilómetros 58,5 y 65,5 (Casu). Na quinta de les víes afectaes, l’AS-264 ente los puntos kilométricos 13,6 y 16, en Cabrales, el riesgu d’ádenes baxó hasta’l nivel 1 o baxu.
Según l’últimu informe de los nivólogos, que de forma dinámica evalúen l’estáu d’estos cinco tramos de la rede viaria, el mantu nivosu baxó notablemente y tiende a estabilizase, polo que se reabrió la circulación.
Desprendimientos
Per otra parte, na rede autonómica permanecen cerraes al tráficu dos carreteres por esprendimientu: l’AS-15 en Sotu de la Barca (Tinéu) y l’AS-334, en Piloña. Otres 27 siguen afectaes de forma parcial por desprendimientu, fundimientos o rotures, anque en toes ta habilitáu’l pasu siquier per unu de los dos carriles de circulación.
Nel casu de los AS-15, nun primer informe preliminar detectáronse trés fragmentos inestables na zona onde se produció’l desprendimientu sobre la vía al so pasu pol conceyu de Tinéu. Personal de caltenimientu y conservación de la Conseyería de Mediu Rural y Cohesión territorial, xunto col de la empresa que realiza l’asistencia técnica, ta aportando con dificultá a la zona al traviés de la vía d’evacuación del tendíu d’alta tensión. En consiguíendose llegar, van baltase los fragmentos inestables y avanzar na solución técnica de contención.
Mentres duren estos llabores, y cuidao que se caltien una previsión d’agües que podría provocar la cayida de los fragmentos, l’AS-15 tendrá de caltenese cerrada al tráficu, colos itinerarios alternativos yá establecíos.
