Axentes de la Dirección del Mediu Natural reintroducieron una cría d’osu pardu güérfana nel Parque Natural de les Fontes del Narcea. La lliberación realizóse na zona que’l personal técnicu consideró óptima, por ser la que presenta condiciones asemeyaes a les del espaciu onde prindaron l’exemplar. El dispositivu de xeolocalización puestu a la cría permitió realizar un siguimientu de los sos movimientos y verificar que’l procesu ta desenvolviéndose de forma satisfactoria. Amás, la información que se llogra ye de gran valor p’adquirir una conocencia precisa de la capacidá de supervivencia de críes d’osu güérfanes nel so primer añu de vida y pa dexar empobinar meyor les decisiones de xestión sobre esta especie.
L’exemplar atopáronlu axentes del Mediu Natural de la que víen unes grabaciones de la contorna del Ríu Naviegu (Cangas del Narcea) el 12 de xunu, y de siguío foron equipos a los llugares averaos p’alcontralu. La busca acabó ensin éxitu y tampoco nun foi posible atopar información sobro la presencia, en feches cercanes, d’una osa adulta, lo que fixo indicar a los técnicos qu l’esbardu atopábase aisláu del grupu familiar.
Siguiendo los criterios alcordaos nel grupu de trabayu sobre l’Osu Pardu Cantábricu, activóse un dispositivu pa prindalu, cola instalación de delles xaules. Desque prindada la cría, treslladóse al Centru de Recuperación de la Fauna Montés, onde-y fixeron un chequéu y-y tomaron muestres. Comprobóse que se trataba d’una fema d’unos 6 meses y 6,7 kg, con bon estáu de salú. Amás, punxéron-y un emisor de señal de radiofrecuencia y de señal de GPS, asemeyaos a los que se punxeron a otros exemplares, como l’esbardu reintroducíu en payares del añu pasáu en Los Picos d’Europa, y que dexen rastrexar al animal desque soltáu.
Protocolu d’actuación
La recuperación qu’esperimentó la población d’osu pardu nel cordal nos últimos años, supón que tamién seya más frecuente alcontrar críes soles. Esta situación pue xenerase por dellos motivos y produzse principalmente dende últimos de la primavera hasta la seronda, cuando los animales tienen ente 5 y 9 meses.
El grupu de trabayu sobre l’Osu Pardo, na so última xunta, punxo de manifiestu la poca información disponible sobre la supervivencia d’estos exemplares na naturaleza basada en datos de siguimientu con tresmisores de señales de posición. Por eso, cola mira d’atenuar esti déficit y dexar adoptar midíes de xestión basaes na meyor información disponible, alcordóse actuar de forma proactiva na captura de los exemplares coles mires de dotalos d’un tresmisor (que se va soltar del cuerpu depués d’unos meses cola muda de pelo) que faiga posible un siguimientu intensivu depués de la so lliberación.
Ente los conseyos establecíos, afitóse que’l periodu de cautividá fore’l más curtiu posible p’amenorgar el riesgu d’avezase al ser humanu, siempre que l’estáu de salú del animal nun aconseye una atención y cuidaos allargaos. Nesti casu, l’esbardu tuvo nel Centru de Recuperación de la Fauna Montés namás 24 hores, aislada dafechu y siguiendo protocolos estrictos pa evitar l’habituación mentada.
