La Conseyería de Derechos Sociales y Bienestar y el Serviciu Públicu d’Empléu del Principáu (Sepepa) suscribieron güei nuevos convenios de collaboración cola Agrupación de Sociedaes Asturianes de Trabayu Asociáu y Economía Social (Asata) y coles empreses Azvase y Antonio Corripio Servicios, especializaes n’ayuda a casa, para facilitar l’insertamientu llaboral de les persones que cobren el salariu social.
Estos trés alcuerdos súmense a los roblaos l’añu pasáu cola Fundación Llaboral de la Construcción y Tragsa pal mesmu fin: promover l’accesu de los perceptores de la renta mínima al mercáu de trabayu. Anguaño, 16.604 llares reciben el salariu social básicu n’Asturies.
Esti tipu de proyectos pilotu impulsaos pol Gobiernu d’Asturies tienen por oxetu testar nueves fórmules para favorecer l’insertamientu llaboral. Según los datos de la Seguridá Social, namás el 20,75% de los titulares del salariu social tán daos d’alta en dalgún de los réximes d’afiliación.
Asata ye una organización empresarial constituyida en 1983 que figura ente los centros collaboradores del Sepepa pa impartir acciones de formación pal empléu dende 1992. Tamién tien autorización como axencia d’allugamientu ensin ánimu d’arriquecimientu dende 2013. En virtú del conveniu suscritu agora, la entidá comprométese a ameyorar la cualificación profesional de les persones qu’ingresen el salariu social al traviés de la formación y a empresta-yos servicios d’intermediación llaboral pa puestos rellacionaos col tresporte y la loxística.
Pela so parte, les empreses Azvase y Antonio Corripio Servicios, centraes nos cuidaos domiciliarios de llarga duración, van incorporar a les sos bolses d’empléu a beneficiarios de la renta mínima, que van tener prioridá nos procesos de reclutamiento y selección de personal. Amás, van recibir formación pa la meyora continua de la so capacitación profesional.
Na firma de los alcuerdos participaron la conseyera de Derechos Sociales y Bienestar, Melania Álvarez; el conseyeru d’Industria, Empléu y Promoción Económica, Enrique Fernández; el presidente de Asata, Ruperto Iglesias García; Fernando Fernández-Kelly Escobedo, conseyeru delegáu de Azvase, y Antonio Corripio Álvarez, alministrador y xerente d’Antonio Corripio Servicios.
Abrir caminos escontra’l mundu llaboral
Melania Álvarez valoró l’esfuerzu que realizó’l Gobiernu d’Asturies dende l’entamu de la llexislatura pa facilitar alternatives a los perceptores de la renta mínima autonómica qu’afonden na so formación y-yos ábran el camín hacia’l mundu llaboral en distintos sectores. “El nuestru principal oxetivu ye que puedan desenvolver una vida plena, autónoma ya independiente, y pa ello ye fundamental ayudar a atopar un puestu de trabayu», indicó.
Pela so parte, Enrique Fernández destacó la collaboración d’Asata y de Azvase y AC Servicios. “La llucha contra’l desempléu y l’esclusión social nun ye solo responsabilidá de les alministraciones, tamién rique del compromisu y la cooperación del sector priváu, porque ensin la so implicación sería bien difícil combatir el paru”, amestó.
Les dos conseyeríes qu’impulsen estos convenios trabayen conxntamente tamién n’otres iniciatives como los planes locales d’empléu, nos que’l 15% de les places acútense pa perceptores del salariu social, lo que permitió que 508 participaren nestos programes nos cinco años postreros.
