El Gobiernu d’Asturies va desenvolver en 2022 actuaciones en 19 conceyos rurales nel marcu del programa d’Árees de Renovación y Rexeneración Urbana (ARRU) del Plan Estatal de Vivienda (2018-2021), con una inversión de 8,2 millones. La convocatoria, la más ambiciosa dende l’entamu de la vixente planificación estatal, va permitir actuar en más de 330 viviendes.
La conseyera de Derechos Sociales y Bienestar, Melania Álvarez, robló güei en Madrid el conveniu de collaboración pal desenvolvimientu d’esti plan cola ministra de Tresportes, Movilidá y Axenda Urbana, Raquel Sánchez, a la que manifestó la necesidá de caltener esti tipu de convocatories, “que resulten esenciales p’afitar población y ameyorar les condiciones de vida de quien vive nes zones rurales”.
“Pa una comunidá como Asturies ye fundamental siguir cuntando con estos programes, que suponen una fórmula esencial pa enfrentanos al retu demográficu”, aseguró Álvarez.
Los conceyos que van poder acometer obres con cargu a la próxima convocatoria son los siguientes: Bual, Cabrales, Cangas del Narcea, Cuaña, El Franco, Grau, Grandas de Salime, Muros, Pravia, Pezós, Peñamellera Baxa, Ribeseya, Salas, San Martín d’Ozcos, Santalla d’Ozcos, Santiso d’Abres, Taramundi, A Veiga y Vilanova d’Ozcos.
El plan inclúi intervenciones n’edificios, viviendes, urbanizaciones y espacios públicos. Tamién s’impulsa’l desenvolvimientu sostenible d’edificaciones y una mayor eficiencia enerxética de les cases. Toles obres realizaes nel marcu d’estes ayudes desenvuélvense siempre cuntando cola opinión de los vecinos, qu’apurren parte de los fondos para la so execución.
Esta ye la cuarta convocatoria que se desenvuelve dientro del Plan Estatal de Vivienda 2018-2021 y el Gobiernu d’Asturies espera qu’estes actuaciones se caltengan nel que se va aprobar para’l periodu 2022-2025.
