La Conseyería d’Alministración Autonómica, Mediu Ambiente y Cambiu climáticu va empecipiar la próxima selmana les obres pa iguar los problemes tanto de perdes como, sobre manera, d’infiltración d’agua de mar na rede de colectores de Les Caleyes, nel conceyu de Villaviciosa. Los trabayos cunten con un presupuestu de 200.300 euros y van allargase un mes.
L’actuación va consistir na renovación d’un tramu deterioráu de 440 metros de colector, que va ser sustituyíu por una tubería nueva de 800 milímetros de diámetru. El tramu anováu empecipia nes proximidaes del campu de fútbol de Les Caleyes y remata n’El Salín, cerca de la ría. La obra afecta a finques privaes, terrenos municipales y al túnel de l’autovía A-8.
La intervención implica tamién la execución de 12 pozos de rexistru, amás de la reposición del pavimentu y el firme afectaos.
Estes obres formen parte d’una iniciativa más amplia de collaboración con distintos conceyos para desaniciar infiltraciones nes conducciones y optimizar asina les redes de saneamientu, el rendimientu de les instalaciones de depuración y el costu d’esplotación de los sistemes.
Anguaño ta en marcha un análisis qu’afecta a Avilés, Llanes, Navia, Ribeseya, Valdés, A Veiga y Villaviciosa, conceyos costeros que presenten una problemática similar, y al que se destinen anguaño 288.510 euros.
