El Gobiernu d’Asturies va poner en marcha oficines de vida autónoma y participativa para persones mayores y con discapacidá col fin de fomentar la so autonomía personal.
La conseyera de Derechos Sociales y Bienestar, Melania Álvarez, esplicó güei na Xunta Xeneral qu’el so departamentu apuesta por un modelu innovador nesti ámbitu, que va incorporar novedaes al respective de los que s’apliquen en comunidaes como Madrid, Cataluña o Navarra. El Principáu apuesta por garantizar tolos derechos y facilitar la vida de les persones mayores y con diversidá na so redolada habitual.
En concretu, les oficines van emprestar serviciu a quien necesiten sofitu pa la inclusión social, la permanencia na so redolada y el desenvolvimientu del so proyectu vital, con independencia de la so edá. Tamién van ufiertar información y orientación sobre los distintos sofitos disponibles pa llograr estos oxetivos, atendiendo particularmente a les necesidaes de muyeres y neñes con discapacidá.
Esta iniciativa va impulsar una convocatoria financiada con fondos europeos y dotada con 725.000 euros del Programa Texu: ecosistemes d’innovación social pa l’adaptación al cambéu social.
Melania Álvarez manifestó que’l nuevu modelu va dexar a les persones alcordar llibremente ónde y con quién deseyen realizar los sos proyectos de vida autónoma. Trátase d’una propuesta trasversal, qu’estiende’l sofitu a toles persones mayores y con discapacidá y que va xuntar a les distintes entidaes xestores del serviciu d’asistencia personal con una visión integral de la diversidá.
