El procesu d’almisión en centros educativos pal próximu cursu empieza’l vienres

Les solicitúes van poder presentase esti añu, como novedá, de manera presencial o telemática

0
501

El Boletín Oficial del Principáu (Bopa) publica l’entamu del procedimientu d’almisión del alumnáu en centros públicos, que va facilitar la escolarización de cerca de 19.000 estudiantes que s’incorporen per primer vegada al sistema educativu o que camuden de centru. El procesu va empezar el vienres, 22 de mayu, a les 10:00 hores. A esa hora, va celebrase’l sortéu de les des primeres lletres del apellíu y del sentíu (ascendente o descendente), que va permitir resolver empates de puntuación. El resultáu d’esi sortéu va publicase nel portal Educastur. Darréu, el llunes 25, van constituyise les comisiones d’escolarización.

Pal alumnáu que yá pertenez a un determináu centru, les llistes provisionales de reserva de plaza en Primaria y Secundaria publicaránse’ll 4 de xunu y les definitives, el día 11 del mesmu mes. Pa estudiantes de nuevu ingresu y pa cambeos de centru, el día 15 de xunu van dase a conocer les places vacantes por cursu, con cuenta de que les persones interesaes presenten les sos solicitúes d’almisión nel centru escoyíu como primer opción, antes del 19 de xunu. El día 30 van publicase les llistes provisionales de solicitúes almitíes y refugaes y el 14 de xunetu, una vegada resueltos los allegamientos, van salir les definitives.

La matrícula del alumnáu d’Infantil, Primaria, Secundaria y primero de Bachilleratu que pase de cursu, y d’aquel de segundu de Bachilleratu que nun titulara, tendrá de formalizase ente’l 23 y el 31 de xunetu. El restu d’estudiantes va matriculaser ente’l 1 y el 7 de setiembre.

Solicitúes per vía telemática

Anguaño, como novedá, el procedimientu va poder realizase de manera presencial o telemática. Los impresos pa la solicitú van tar disponibles nel portal Educastur y nos mesmos centros. La baremación va tener en cuenta si l’alumnu tien hermanos matriculaos nel centru, si los sos padres tán emplegaos ellí y si dalgunu de los sos representantes llegales trabaya nes proximidaes. Coles mesmes, va valorase si cumple con un determináu nivel de renta, si la familia ye numberosa o monoparental o si la persona solicitante s’atopa en situación d’acoyimientu familiar. Amás, va evalúase l’espediente académicu y si dalgún miembru de la familia tien un grau de discapacidá igual o superior al 33%.