El programa electora de Podemos Asturies pa estes elecciones del 28 de mayu axunta delles propuestes alredor de la normalización del asturianu y l’eonaviegu. Nel apartáu dedicáu a la reforma del Estatutu d’Autonomía que proponen apaez un puntu dedicáu a la oficialidá. La formación morada quier «otorga-y al asturianu y al gallego-asturianu l’estatus d’idioma cooficial pa que cada ciudadana o ciudadanu de la nuesa comunidá autónoma pueda emplegar nel ámbitu públicu la llingua pola qu’opte llibremente nel exerciciu democráticu d’un drechu civil, ensin discriminaciones nin imposiciones», espliquen.
No que cinca al ámbitu del enseñu, dediquen un puntu a «Educación n’asturianu», reclamando que «La nuesa llingua nun pue siguir siendo un apartaz marxinal y precarizáu na educación pública asturiana», pa lo que proponen trés midíes: «impulsar el diálogu col Gobiernu estatal pa facer realidá la especialidá docente de llingua asturiana y que los y les maestres y profesores puedan exercer el so llabor en condiciones dignes como les demás, promover la superación del actual modelu d’opcionalidá n’educación primaria, que nun tien otra razón de ser que satisfacer prexuicios ideolóxicos, y retomar el desenvolvimientu y promoción de los programes educativos col asturianu como llingua vehicular».
Pal campu de la cultura comprométense al «Fomentu de la creación cultural y artística en llingües minorizadas, impulsando espacios de referencia pal fomentu y promoción de la creación n’asturianu y gallego-asturianu que complementen a les sovenciones directes y potencien los circuitos esistentes». Ente eses midíes señalen la idea de «Fomentar la conexón y l’intercambiu cultural coles escenes de les distintes llingües propies y cooficiales nel Estáu, según con otres comunidaes de llingües minorizadas nel mundu».
El programa recueye tamién propuestes pa la RTPA, onde camiente necesaria una presencia de les llingües d’Asturies «amplia y tresversal, con emisiones regulares de conteníos infantiles, informativos y retresmisiones deportives». Pa Podemos Asturies «la normalización llingüística ten de ser una exa central de la misión de RTPA como serviciu públicu». Comprométense a «aumentar sustancialmente la partida presupuestaria destinada al usu del asturianu y del gallego-asturianu na RTPA, y roblar un conveniu de collaboración con RTPA para la creación d’un Serviciu Asturianu de Doblaxe y Traducción, destináu a nutrir de conteníos diversos a la canal pública».
