- El Principáu impulsa nos conceyos del suroccidente un análisis de la soledá y fraxilidá de les persones mayores
- El programa Rompiendo distancies, qu’avera servicios a les persones mayores que viven na zona rural, atendió mientres l’añu pasáu a 5.228 persones en 39 conceyos asturianos, 1.599 menos que nel 2019 pol impactu de la pandemia.
La conseyera de Derechos Sociales y Bienestar, Melania Álvarez, facilitó estos datos mientres la so comparecencia na Xunta Xeneral, onde afirmó que la media d’usuarios del programa ye de 6.500 y que la previsión p’anguaño ye recuperar o superar eses cifres.
Rompiendo distancies funciona n’Asturies dende va 20 años y ye una de les ferramientes principales del Principáu pa lluchar contra la soledá ensin deseyar y l’aislamientu social de les persones mayores. Proporciona apoyu domiciliariu que resulta esencial pa desenvolver una vida autónoma, segura y activa, como servicios de peluquería, biblioteca, llavandería, atención personal o comida a domiciliu, ente más otros. Amás, los equipos de profesionales de los 15 grupos del programa nes distintes zones de la comunidá fomenten la participación de los mayores n’actividaes empobinaes a favorecer les sos rellaciones interpersonales.
Álvarez esplicó que’l so departamentu dispón tamién d’otres ferramientes pa identificar y dar respuesta a posibles situaciones d’aislamientu social, como’l programa Senda, que dexa a los profesionales del sistema de servicios sociales identificar automáticamente, a partir de los datos del padrón, a persones mayores que pudieren precisar apoyu.
Per otra parte, Derechos Sociales ta llevando a cabu nel suroccidente un análisis pormenorizáu por parroquies rurales pa ellaborar un diagnósticu precisu de la soledá y fraxilidá de persones mayores nestos conceyos. El proyectu parte del trabayu fin de máster de la Universidá d’Uviéu Intervención e investigación socioeducativa. Evaluación de la calidad de vida de personas mayores en el área II de servicios sociales del Principáu, nel que s’analicen les ventayes y desventayes de vivir nel mediu rural y el contentu sobre los servicios d’ayuda a domiciliu.
