La Conseyería d’Alministración Autonómica, Mediu Ambiente y Cambéu Climáticu caltien activu per segundu día consecutivu’l protocolu d’actuación énte episodios de contaminación del aire, nel so nivel preventivu (nivel 0), na área d’Uviéu, al persistir niveles altos de partícules en suspensión na atmósfera y condiciones desfavorables de ventilación.
El dispositivu actívase en nivel 0 cuando la concentración de partícules na atmósfera ye cimera a 25 microgramos per metro cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), mientres trés díes, en al menos una estación de la zona, y simultáneamente esiste previsión de fenómenos meteorolóxicos qu’enzanquen l’espardimientu de contaminantes (estabilidá atmosférica, inversión térmica y ausencia d’agües).
Según les previsiones de l’Axencia Estatal de Meteoroloxía (Aemet), la ventilación nel área Uviéu va ser desfavorable güei, polo que se dan les condiciones pa caltener l’alerta.
La aglomeración de la área d’Uviéu inclúi, amás d’esti conceyu, los de Noreña, Siero, La Ribera y Llanera, según la zona industrial de Morcín.
Les estaciones de la rede de control del Palaciu de los Deportes d’Uviéu y la de Llugones, en Siero, detectaron valores percima de los estragales previstos pa les partícules PM 2,5.
El restu d’estaciones que monitoricen la calidá del aire n’Asturies nun presenten simultáneamente valores de concentración de partícules en suspensión y condiciones desfavorables de ventilación qu’esixan l’activación del protocolu.
La Conseyería de Mediu Ambiente echó voz ayeri l’activación del protocolu a los representantes de les alministraciones afectaes, al traviés de los miembros de la comisión de valoración y siguimientu. Coles mesmes, comunicóse a los servicios competentes en materia de salú pública y atención sanitaria.
Los conceyos afectaos pueden adoptar les midíes que consideren afayadices p’amenorgar la contaminación, como’l riego de viales y carreteres. Tamién se va reforzar la inspección ambiental a les empreses de la área afectada.
El Principáu encamienta que les persones especialmente sensibles (adultos o neños con problemes respiratorios, patoloxíes cardiaques, EPOC, etcétera, muyeres embarazaes y lactantes) planien l’actividá física y amenorgar si esperimenten síntomes. Tamién se-yos aconseya alloñar de les víes con más tráficu.
