La Conseyería de Fomentu, Cooperación Local y Prevención de Quemes va poner en marcha’l proyectu pilotu del nuevu plan de tresporte a los Llagos de Cuadonga del 2 al 10 d’avientu, con motivu de la ponte festiva de la Constitución. Esta prueba va dexar detectar los aspectos susceptibles de meyora, de cara a la implantación definitiva del programa en 2024. Les midíes que se van poner en marcha n’avientu van evitar l’encruz d’autobuses na xubida a los llagos, van ameyorar les frecuencies y van evitar coles, al comercializar antemanadamente les 2.700 places diaries.
Rreorganízase asina l’operativu actual col fin d’amenorgar la intensidá del tráficu, facer más curiosu’l serviciu y afitar horarios y frecuencies de salida y regresu al espaciu protexíu. D’esta miente, búscase siguir avanzando na meyora de la organización y na redistribución de l’arribación de visitantes, al ufiertar una ufierta fixa nel númberu de places diaries.
La salida de los autobuses escontra los llagos va producir dende trés puntos en cada franxa horaria: Cangues d’Onís, El Monte y Muñíu, con paraes n’El Repelao y Cuadonga. Les persones usuaries tendrán d’adquirir los billetes d’ida y vuelta antes d’aportar al autobús, bien por aciu la so compra telemática, en taquilla o nos puntos de vienta o axencies de viaxe habilitaes. Asina, el primer serviciu de la mañana va partir escontra los llagos a les 8:00 y el postreru, a les 16:00 hores. En sentíu contrariu, el primeru que va salir de los llagos va ser el de les 11:05 y el postreru, el de les 19:05 hores.
Mientres la ponte de la Constitución, últimu periodu de vixencia del plan especial de tresporte d’anguaño, va caltenese’l zarru de la carretera a automóviles ensin autorizar mientres les 24 hores del día.
Per otra parte, avanzóse na ellaboración d’un documentu técnicu pa l’adecuación de diez zones d’encruz na carretera de los Llagos, nes que se van habilitar sobreanchos adicionales a la plataforma actual, d’ente 1,5 y 2 metros, y llonxitudinales, de 16 a 32 metros, col propósitu de facilitar el tránsitu de vehículos. Dos d’estes zones, les asitiaes nel mirador de la Reina y nel altu de Teón, van dexar, de la mesma, realizar cambeos de sentíu en casos d’emerxencia o evacuación.
