Esti martes 14 de xunu celebrase nel Palaciu de Congresos de la Cortil Ferial Luis Adaro de Xixón, el Salón Sidra d’Asturies, entamáu pol Conseyu Regulador de la DOP Sidra d’Asturies. Tratase del mayor puntu d’alcuentru de profesionales del sector sidreru: llagareros, productores, cosecheros, distribuidores, hosteleros, etc.

Esta xornada foi inaugurada pol presidente del Conseyu Regulador, Guillermo Guisasola. “Queremos llegar a los cinco millones de contraetiquetas en 2022. Pidimos a los asturianos que la consuman”, aprofió Guisasola. El responsable de Mediu Rural de Caxa Rural d’Asturies, Javier Nievas, destacó’l compromisu de la entidá qu’él representa colos sectores productor, ellaborador y comercializador.

Pela so parte, el presidente de OTEA, José Luis Álvarez Almeida, incidió nel impulsu y sofitu que dende la patronal hostelera dan a esti productu. “Inculcamos a los hosteleros qu’esti ye’l camín. La sidra d’Asturies tien que ser la única sidra del mundu onde la calidá y el respetu pol medioambiente tea simbolozáu nuna botella”, esplicó.

La tercer vez de palabra foi pal director xeneral de Cultura y Patrimoniu del Principáu d’Asturies, Pablo Llión, qu’incidió na importancia del procesu en cursu de la candidatura de la Cultura Sidrera Asturiana a Patrimoniu Inmaterial de la Humanidá pola Unesco. Cerró la vez d’intervenciones institucionales la directora xeneral de Desenvolvimientu Rural y Agroalimentación, Begoña López. “Llevamos enforma tiempu sofitando a toles DOP y IGP, y ese esforcio vese compensáu. Anque nun mos conformamos. Vamos ameyorar la calidá y la formación en caúna d’elles, col oxetivu clavu d’afitar población nel mediu rural”, sorrayó.

Tres la so intervención, tuvo llugar la entrega de premios a les meyores Sidres d’Asturies del añu:

Sidra Natural Tradicional

  • Premio Oru: Quelo DOP
    Premio Plata: Piñera DOP
    Premio Bronce: Zythos, de Sidra Herminio

Sidra Natural Espumoso 

  • Pomarina, de Valle Ballna Fernández (Grupo El Gaitero)

Sidra Natural Filtrada

  • Ramos del Valle, de Sidra Fran

L’actu institucional remató con un actu especial nel que se desveló a la embaxadora de la Sidra d’Asturies 2022. Anguaño recayó na periodista y actriz asturiana: Paula Prendes. “Yo soi bien asturiana. Allá onde voi, intento treslladar los valores de la nuesa tierra. Espero que la Unesco nome a la cultura sidrera asturiana como patrimoniu inmaterial de la humanidá”, manifestó una vegada afayóse tres un tonel de sidra.