El rector de la Universidá d’Uviéu, Ignacio Villaverde, anovó’l so equipu de gobiernu cola incorporación de Pilar García Cuetos, qu’asume’l Vicerrectorado d’Estensión Universitaria y Proyección Cultural, y Begoña Cueto Iglesias, que se fai cargu del Vicerrectorado de Tresferencia y Relaciones cola Empresa. García Cuetos sustitúi nel cargu a Carmen Adams, que presentó la so dimisión para entamar nuevos retos profesionales, y Cueto Iglesias asocede a Susana Menéndez Requejo, que formalizó’l so arrenunciu por motivos familiares.
El rector Ignacio Villaverde tuvo palabres d’agradecimientu para les vicerrectoras salientes pol so trabayu y esfuerzu nestos meses y reconoció l’arrogancia de los entrantes al tar dispuestes a dedicar el so tiempu a esti proyectu. Animó a los dos nueves vicerrectoras a entamar un camín “non exentu de dificultaes, pero tamién bien ilusionante”. Villaverde señaló que dambes vicerrectoras apurren un bagaxe d’enorme talentu, esperiencia y capacidá de xestión que van facilitar el cumplimientu de los oxetivos que se marcó l’equipu rectoral fai agora diez meses”.
Pilar García Cuetos, nueva vicerrectora d’Estensión Universitaria y Proyección Cultural, ye catedrática de la Área d’Hestoria del Arte, especializada na hestoria del caltenimientu y restauración del patrimoniu históricu-artísticu. García Cuetos manifestó que “la función primordial que tenemos encamentada dende’l vicerrectorado ye contribuyir a potenciar el nexu ente la nuesa universidá y la sociedá asturiana y a poner al so serviciu la conocencia qu’ellaboramos”. “Aspiramos a llegar a tou’l nuesu territoriu, a collaborar coles instituciones, les entidaes sociales, empresariales y les fundaciones, a integrar al nuesu estudiantáu nesti llabor ilusionante y a contribuyir a la preservación y arriquecimientu de la cultura y el patrimoniu n’Asturies y al so progresu sostenible”, sorrayó.
Begoña Cueto Iglesias, nueva vicerrectora de Tresferencia y Relaciones cola Empresa, ye catedrática del Departamentu d’Economía Aplicada onde desenvuelve la so actividá investigadora nel campu de la evaluación de polítiques de mercáu de trabayu, la formación ocupacional y continua y l’empléu autónomu. Cueto indicó qu’el so propósitu al frente del vicerrectorado ye “siguir col trabayu empecipiáu por Susana Menéndez Requejo, potenciando les relaciones ente Universidá y Empresa, al empar que tratamos de contribuyir a la meyora de la empleabilidá de los nuesos estudiantes”.
