Mañana xueves, día 26 d’ochobre, el Serviciu d’Emerxencies del Principáu d’Asturies (SEPA) y los titulares de diez preses de la rexón van activar, en manera de prueba, el sistema acústicu de serenes d’emerxencia disponible p’alvertir a la población d’una posible catástrofe. La finalidá ye que la población que pudiera vese afectada en casu de rotura de la presa sepa cómo actuar. Identificar esti soníu y saber qué midíes de autoprotección tienen d’aplicase, la principal, alloñar de los calces de los ríos y regueros y allegar a sitios elevaos.
El soníu d’estes serenes algama aquelles zones que quedaríen anubiertes na primer media hora dende la rotura de la presa. Les serenes de cada presa actívense toes al empar pero cada instalación va realizar la so prueba de forma individual y según l’orde consensuáu nel comité d’implantación.
Los responsables de cada instalación van comunicar al 112 l’activación de les serenes col soníu d’alerta y pasaos aprosimao unos 10 minutos van echar voz de l’activación de les serenes col mensaxe indicativu de fin d’alerta.
El soníu d’alerta consta de 3 tramos d’un minutu de duración, con soníu ascendente, dixebraos por intervalu de 5 segundos de silenciu. El de fin de l’alerta ye una señal siguida de 30 segundos.
Na preparación del exerciciu, amás de los titulares de les preses, tuvieron un papel bien destacáu tolos conceyos implicaos emitiendo los correspondientes bandos informativos y poniendo a disposición a los sos policíes locales y a les sos agrupaciones de voluntarios de Protección Civil. Tamién cabo destacar la disposición amosada dende Delegación de Gobiernu cola participación de la Guardia Civil y dende’l Gobiernu del Principáu, amás del SEPA y los parques de Bomberos d’Asturies allugaos nestes zones, púnxose a disposición al personal de la Guardería de Mediu Natural.
