El Serviciu d’Investigación y Desenvolvimientu Agroalimentario (Serida) lidera un proyectu pa desenvolver técniques innovadores nel caltenimientu de los recursos xenéticos, lo qu’abre una vía importante pa la industria ganadero y la recuperación d’especies en peligru d’estinción. El programa Mother céntrase na crioconservación de ovocitos inmaduros pa protexer el potencial reproductivu de les femes de ganáu vacunu al traviés de la preservación de la corteza ovárica.
La investigadora del área de Xenética y Reproducción Animal y encargada de coordinar el proyectu, Carmen Díez Monforte, esplicó que, según un recién estudiu, el 95% de los ovocitos presentes nel ovariu de la vaca nun son aprovechaos al nun algamar l’estadiu óptimo de desenvolvimientu. “Sicasí, son un material d’altu valor pa los programes de caltenimientu de recursos xenéticos”, precisó.
Por aciu el desenvolvimientu d’estes técniques de caltenimientu de la corteza ovárica amontaríase’l potencial reproductivu de les femes, lo que podría tener gran impactu en múltiples especies d’animales. Amás, puede repercutir tamién na salú reproductiva humana, al proponer una alternativa al métodu actual de conxelación/desconxelación de la corteza ovárica que requier el so posterior tresplante.
Ello ye qu’unu de los oxetivos del proyectu contribuyiría al caltenimientu de recursos n’animales en peligru d’estinción, como les races autóctones asturianes. Na actualidá, los ovocitos nun se caltienen en bancos de recursos zoogenéticos por cuenta de la so alta sensibilidá nos procesos de conxelación. Poro, el desenvolvimientu de nueves técniques dexaría abrir otres posibilidaes de preservación del patrimoniu xenéticu asturianu.
Anguaño, los bancos de ovocitos solo esisten en clíniques de reproducción asistida humana y tienen especial valor p’aquelles muyeres que, de resultes de tratamientos como la quimioterapia, pueden ver anulaes o menguaes les sos posibilidaes de tener fíos. Tamién resulten útiles pa quien deciden retardar la maternidá. Por estes razones, el desenvolvimientu de nueves técniques optimizaes que depués puedan ser extrapolables a estes clíniques tien especial relevancia y constitúi unu de los oxetivos del proyectu.
Esta iniciativa va suponer tamién una importante contribución pa la industria ganadero y podría dexar un últimu aprovechamientu del potencial reproductivu de femes con altu valor xenéticu que por dalguna razón tuvieren que ser sacrificaes.
La conxelación de la corteza ovárica pa caltener ovocitos n’especies animales tien entá un calter esperimental. “Lo que’l proyectu plantega ye la posibilidá de desenvolver tecnoloxíes pal caltenimientu de los folículos presentes na corteza ovárica que contienen los ovocitos en distintos estadios de desenvolvimientu, coles mires de recuperalos a posteriori y sometelos a un procesu pa producir embriones in vitro”, indicó Marta Muñoz, investigadora del proyectu.
