El Serviciu d’Emerxencies del Principáu d’Asturies (SEPA) incorporó trés drones d’última xeneración a los sos medios d’intervención como sofitu aereu n’emerxencies. Les aeronaves van tar llistes pa operar en cualquier puntu d’Asturies nun tiempu máximu de dos hores, tanto de día como de nueche, los 365 díes del añu.
Los drones, tamién conocíos como RPAS poles sos sigles n’inglés, Remotely Piloted Aircraft System, van tener asignaes les funciones d’observación, coordinación y toma de datos en catástrofes antrópiques, naturales o de cualquier otra mena; en xeres de valoración, vixilancia y siguimientu de quemes forestales, y de cualquier emerxencia.
Tamién se van usar pal llevantamientu de perfiles topográficos; midíes de perímetros y superficies; misiones de busca y rastrexu en cualquier tipu de mediu; vixilancia y reconocencia de zones en situaciones d’altu riesgu nes que s’activare dalgún plan de Protección Civil, y como sofitu a cualquier actividá rellacionada coles competencies del SEPA.
Los equipos van tar disponibles con, polo menos, dos pilotos con titulación emitida pola Axencia Estatal de Seguranza Aérea (AESA) acordies cola normativa en vigor pal pilotaxe d’estos vehículos aéreos non tripulaos.
Depués de la so activación al traviés del 112 Asturies, el dron va tener que tar presente nun máximu de dos hores nún de los puntos d’alcuentru que s’establecieron pol SEPA y que se correspuenden con cuatro zones xeográfiques: noroccidente, suroccidente, centru y oriente.
Los drones puen volar de nueche y unviar imáxenes en tiempu real al puestu de mandu avanzáu, al gabinete de crisis o al sitiu que se precise. Disponen de cámares d’alta definición y sensores térmicos que puen usase pa la localización de persones. Tamién lleguen a zones onde un helicópteru nun pue llegar, lo qu’aforra riesgos tanto pal pilotu como pa la tripulación. N’emerxencies, la información apurrida por estes aeronaves resulta de gran importancia pa que l’equipu de mandu pueda tomar decisiones que redunden na eficiencia del serviciu y la optimización de los recursos disponibles.
La incorporación de los RPAS a los medios d’intervención de Bomberos del SEPA nun supón nengún costu adicional pal serviciu. Estos equipos formen parte de les meyores incluyíes pola empresa axudicataria del contratu de medios aéreos pa los cinco años venideros, que’l so importe global xube a 15,8 millones.
Esti contratu dexa al organismu siguir cuntando con trés helicópteros, ún d’ellos biturbina y medicalizáu, y dos monoturbines y multifunción amás de los drones que s’incorporen como sofitu aereu ocasional.
