Les obres de renovación de la llínea L.lena-Uviéu van adaptar la so planificación pa evitar el corte del tráficu ferroviariu. El Ministeriu de Tresportes, Movilidá y Axenda Urbana confirmó al Gobiernu d’Asturies que se van tener en cuenta les necesidaes d’esti serviciu pa que esta importante inversión, d’unos cien millones, tenga’l menor impactu posible.

El conseyeru de Mediu Rural y Cohesión Territorial, Alejandro Calvo, va caltener la próxima selmana una xunta col Adif p’analizar y concretar los aspeutos técnicos. El Gobiernu d’Asturies va plantegar distintes alternatives qu’eviten la interrupción del serviciu ferroviariu mientres los fines de selmana, como que los trabayos que se vaigan a realizar a partir de 2024 facer n’horariu nocherniegu y con zarros alternativos d’una de les dos víes de la llínea L.lena-Uviéu.

Al respective de la Variante de Payares, el Gobiernu del Principáu esixe que la so puesta en serviciu se faiga realidá nel menor tiempu posible, anque entiende que la prioridá absoluta tien de ser garantizar la seguridá de los viaxeros y fiabilidá de la llinia. Nesti sentíu, el conseyeru destacó que les pruebes de seguridá siguen según el calendariu previstu y que, como yá se dixo n’anteriores ocasiones, la fecha concreta de puesta en serviciu comercial de la variante va depender finalmente de l’aprobación per parte de l’Axencia Estatal de Seguridá Ferroviaria.

“Qu’esa fecha pueda ser más allá del mes de mayu ye una posibilidá si tenemos en cuenta la incertidume técnica descrita, pero en nengún casu tien de restar valor al saltu históricu que l’apertura de la variante y la llegada de l’alta velocidá va suponer pa les comunicaciones d’Asturies”, manifestó Alejandro Calvo. Nesti sentíu, amosó’l so enfotu en que nes próximes selmanes les pruebes avancen de manera decisiva escontra la puesta en serviciu de la infraestructura, incluyíu tol percorríu comercial Llión-Uviéu-Xixón.