El xuráu del Premiu Princesa d’Asturies de Cooperación Internacional decidió concede-y el premiu esti añu 2022 a la emprendedora social británica Ellen MacArthur por ser un referente na llucha pa un meyor usu de los recursos naturales y por acelerar la transición escontra la llamada economía circular.

Ellen MacArthur trabaya cola so Fundación pa camudar l’actual paradigma de producción y consumu por aciu un aprovechamientu de los recursos basáu nel amenorgamientu, la reutilización y el reciclaxe de materiales de forma sostenible. La so capacidá de promover aliances con gobiernos, empreses, instituciones científiques y sociedá civil contribuyó a forxar el primer gran alcuerdu internacional que va ser xurídicamente venceyante contra la contaminación por plásticos.

El xuráu valoró, amás, el so trabayu pa fomentar un cambéu na cultura de producción y consumu responsable na industria testil, ente otros de los sos grandes compromisos.