El Gobiernu d’Asturies empecipió la llicitación del primeru de los ocho carriles bici colos que se va fomentar la movilidá sostenible y segura nel conceyu de Siero. L’actuación, con un presupuestu base de 314.563 euros y un plazu d’execución de trés meses, contempla la construcción de 600 metros de vía ciclable ente l’avenida d’Uviéu y la ponte del Nora, en Llugones.
Esta obra va conectar la localidá col vecín conceyu d’Uviéu al traviés d’un carril bici que s’estrema en dos tramos. Nel primeru d’ellos, allugáu na redolada de la glorieta d’accesu a l’autovía AS-II, van construyise dos carriles de 1,9 metros d’anchor nos dos estremos de la calzada. Nel segundu, de 380 metros de llargor, va disponese una vía bidireccional na marxe derecha sentíu Uviéu que va tener un anchu d’ente 2,15 y 2,3 metros.
Amás, el Principáu licitará nos próximos díes otros dos carriles bici pa Llugones. El primeru, con un presupuestu de 143.000 euros y un plazu d’execución de trés meses, va conectar l’avenida de Viella y la vía Santa Isabel al traviés de la cai Cuadonga. El segundu, dotáu con 130.000 euros y tamién con trés meses de plazu de construcción, va xunir les cais de Leopoldo Lugones y Juan Uría Ríu.
Per otru llau, ta previstu empecipiar la llicitación del contratu de suministru, montaxe ya instalación de cien nueves places d’aparcamientu seguru pa bicicletes, que se van asitiar principalmente en Llugones, pero tamién en La Fresneda y Viella. En total, van habilitase 14 estaciones con capacidá pa ente 4 y 9 bicicletes d’anchu estándar y una d’anchu especial pa persones con movilidá amenorgada. Esti equipamientu, que cunta con un presupuestu de 519.739 euros, va dexar a los usuarios disponer d’un llugar seguru y a cubiertu onde aparcar la so bicicleta, nel que tamién van cuntar con llume led y toma de corriente.
Toes estes intervenciones lleváronse a cabu en coordinación col Conceyu de Siero, coles mires de complementar y reforzar la rede de carriles ciclables que foi desenvolviendo nos últimos años.
