El Principáu va poner en marcha nes próximes selmanes una campaña pa captar nómades dixitales, esto ye, profesionales venceyaos al ámbitu de les nueves tecnoloxíes que quieran teletrabajar dende Asturies. La Conseyería de Ciencia, Innovación y Universidá presentó güei la iniciativa a alcaldes y alcaldeses nun actu celebráu na Federación Asturiana de Conceyos (FACC), col propósitu d’implicar a tolos conceyos nesti programa.
Los conceyos que lu deseyen van poder xuntase como llugares d’acoyida de nómades dixitales y destacar les sos fortaleces y servicios. Pa ello, va poner en marcha una plataforma web onde los conceyos van espublizar los beneficios de vivir nel so territoriu. Esti espaciu tamién se va poner a disposición de les empreses comenenciudes en captar profesionales que desenvuelvan el so llabor de forma telemática.
En paralelu, va llanzase una campaña d’espardimientu en redes sociales dirixida a los colectivos y sectores profesionales identificaos con esti movimientu del teletrabajo fora del so llugar de residencia.
El programa, que cunta con un presupuestu total de 200.000 euros distribuyíu en delles fases, va incluyir tamién l’apertura d’una oficina que va emprestar asesoría y acompañamientu a los posibles nómades dixitales. Esti dispositivu va ayudar a les persones comenenciudes a buscar vivienda o resolver trámites alministrativos y va acompañar en cuestiones familiares como escolarización, servicios médicos o sociales.
L’oxetivu ye atraer, xenerar y retener talentu al traviés d’una estratexa de captación nacional ya internacional, y que tolos conceyos convertir en territoriu de nómades dixitales y puedan acoyer a estos profesionales qu’usen les tecnoloxíes para trabayar de forma remota dende cualquier llugar.
Para la puesta en marcha d’esta campaña, realizóse un plan director con indicadores sobro calidá de vida de la comunidá y criterios que tienen de tener en cuenta los conceyos si quieren resultar curiosos pa los nómades dixitales. Nos próximos díes va facilitase xuna encuesta a los conceyos pa evaluar los servicios de los que disponen y otra a les empreses comenenciudes en sumase al plan.
El conseyeru de Ciencia, Borja Sánchez, aseguró que’l Principáu ye un destín bien afechu pa los nómades dixitales, polos sos servicios, la so calidá de vida y les sos comunicaciones. “Esta iniciativa ye, amás, xuna forma d’intentar llevar población a la zona rural y contribuyir a reactivar les economíes locales. Coles mesmes, puede convertise nuna vía pa facilitar la torna de talentu, yá que falamos en munchos casos de profesionales que trabayen nel sector de les altes tecnoloxíes, con gran demanda n’Asturies”, precisó.
El primer pasu foi informar a los conceyos del entamu de la campaña, na que se va solicitar la participación de los conceyos. Na presentación, que se desenvolvió per vía presencial y telemática, tamién participaron el director xeneral d’Innovación, Iván Aitor Lucas, y la presidenta de la FACC, Cecilia Pérez.
