Morgan ta de xira y esta fin de selmana toca Xixón. Entrevistamos a la conocida banda de rock alternativu, aprovechando que’l tour del discu Hotel Morgan pasa per Asturies. El próximu sábadu 21 de febreru, la Sala Acapulco de Xixón va convertise nel espaciu físicu qu’allugue esi «hotel» al que’l grupu nos convida cola so música. El públicu va ser recibíu y acomodáu nos distintos cantares del discu que da nome a la xira, ensin escaecer dalgunos de los sos ésitos d’álbumes anteriores: espacios sonoros nos que poder esfrutar del bon facer musical de Morgan.
¿Qué simboliza Hotel Morgan? ¿Ye un llugar físicu, emocional o conceptual?
Ye’l llugar conceptual onde conviven estos nuevos cantares, un llugar nel que caún tien el so espaciu pero al mesmu tiempu comparten una estructura común col restu.
¿En qué momentu vital naz esti discu?
Naz xusto depués d’acabar una de les nueses xires más llargues y esitoses hasta esi momentu, ún de los momentos de mayor felicidá y estabilidá que vivéramos como banda.
¿Qué diferencia a esti álbum de los vuestros trabayos anteriores?
Ye l’álbum nel que más abrimos l’abanicu d’influencies, estilos y nuevos soníos. Hasta agora intentábemos que los discos tuvieren un soníu concretu que conectare los cantares unos con otros a lo llargo de tol discu, sicasí n’Hotel Morgan busquemos que cada cantar tenga’l so propiu universu sonoru.
¿Cómo foi esta vegada’l procesu de composición?
Xuntámonos por vez primera en xunu del 2024 pa sentir los cantares y idees que Paco y Nina escribieren mientres el parón que fiximos tres de la xira de The River y a diferencia de los trabayos anteriores. nesti casu quiximos ser más directos y rabiones a la d’iguar y ensayar los cantares. Tener munchos meses de composición y ensayos non siempre ye lo meyor y esta vegada decidimos trabayar namás mientres seis selmanes nel llocal al pie de Martín García Duque y dir directos pal estudiu.
¿Cómo ta siendo la recepción del públicu nesta xira?
Ensin dulda ta siendo la nuesa meyor xira hasta’l momentu, el públicu ta respondiendo perbién a los nuevos cantares. L’añu pasáu fiximos una xira per teatros y auditorios na qu’axuntamos a la banda dos coristes pa presentar el nuevu discu y agora tamos somorguiaos na xira de sales na que recuperemos dellos cantares que llevábemos tiempu ensin tocar y el directu ta más equilibráu ente los cuatro discos.
Depués de tantos años xuntos, ¿cómo evolucionó la vuestra relación personal y artística?
Somos amigos dende munchos años enantes de montar la banda y eso fai que l’amistá seya siempre lo primero que nos xune. Ye verdá que cuando una banda empieza a xenerar un nivel de trabayu considerable hai munches situaciones nueves qu’hai qu’aprender a xestionar, y permediar eso llevónos un tiempu. Y a nivel artísticu tamos más seguros y abiertos que nunca.
¿Cómo vivís la industria musical actual, col pesu del streaming y les redes?
Nun somos una banda que teamos demasiao esmolecíos por una cosa nin pola otra, centramos la mayoría de la nuesa enerxía en facer bonos discos y bonos conciertos y como lo que pase depués nun ta de mano nuesa, nun da-y munches vueltes.
¿Sentís presión polos númberos o sois quien a caltenevos al marxe?
Mirámoslos y tamos sollertes a lo que pasa pero lo realmente importante pa nós ye ver que los conciertos y los recintos van medrando con cada xira, esos sí son númberos reales y importantes pa Morgan y non tanto los siguidores que tengamos nes redes sociales.
¿Qué importancia tien pa vós anguaño’l formatu físicu?
Enforma, la venta física pa una banda independiente y autoxestionada como la nuesa ye fundamental pa la sostenibilidá del proyectu. Tamos mui agradecíos a tola xente que pasa pel puestu de merchandising depués de los conciertos porque son una parte bien importante pa que la banda pueda siguir alantre.
¿Qué deprendistis sobre vós mesmos nesti últimu discu?
Que somos capaces de facer un discu en muncho menos tiempu del que tábemos avezaos y qu’inda hai munchos soníos y caminos nuevos por esplorar.
¿Qué significa “ésitu” pa Morgan nesti momentu?
Poder dedicanos namás al grupu pudiendo facer la música que nos apitez y nos presta, siendo llibres y pudiendo llevar la nuesa carrera al nuesu ritmu.
¿Qué mieu sigue presente cuando llanzáis dalgo nuevo?
Nun avezamos tener mieu nesos momentos pero sí munchos nervios y espectación por ver cómo recibe la xente los nuevos cantares.
