El Principáu aprobó esti vienres el decretu qu’establez los niveles de competencia nel usu del asturianu, afechos al Marcu Común Européu de Referencia de les Llingües, y regula les esámenes oficiales. En concretu, habrá certificaos de nivel básicu (A1 y A2), mediu (B1 y B2) y avanzáu (C1).
Esta normativa aprobada en Conseyu de Gobiernu desenvuelve la Llei 1/1998, de 23 de marzu, d’Usu y Promoción del Asturianu. L’artículu 11 dispón que’l Principáu va establecer les certificaciones qu’acrediten la conocencia d’esta llingua. Cola so entrada a valir, la ciudadanía va poder demostrar el so nivel competencial. Les pruebes van ser iguales en tola comunidá. Los esámenes oficiales d’asturianu van contar de cinco partes: comprensión de testos orales, comprensión de testos escritos, producción y coproducción de testos orales, producción y coproducción de testos escritos y mediación.
Los certificaos que se llogren van poder ser valoraos nos procesos de reconocencia de méritos que se xestionen nel Principáu. Nel decretu tamién se prevé la ellaboración del proyectu normativu pa regular los niveles de competencia del gallego-asturianu.
