Ayeri celebrábase una xornada que suel ser de trámite y pasa ensin malapenes atención mediática nel Capitoliu de los Estaos Xuníos d’América, la de la confirmación de los votos del presidente electu enantes de la toma de posesión del viniente 20 de xineru. Sicasí, les tensiones creaes nos meses caberos pol entá Presidente Donald Trump diben xenerar una esperpéntica xornada nel edificiu qu’agospia les cámares de representantes del país más poderosu del mundu.
Un grupu de radicales siguidores del presidente saliente ocupaben l’edificiu y llevaben alantre lo que podría calificase como un intentu de golpe d’estáu. Los congresistes y senadores de la primer potencia mundial tuvieron de ser evacuaos y escondíos énte’l peligru pa la so vida.
Mientres el presidente Trump pidía paz siguía anenciando en Twitter no que considera unes elecciones robaes polos democrates, magar que perdió tolos procesos xudiciales abiertos contra’l procesu.
Ente los siguidores de Trump que tomaron el Capitoliu, radicales de dreches, ultranacionalistes americanos y otros grupos supremacistes, pudieron vese esperpéntiques imáxenes, dende la vestimenta a les declaraciones feches nel interior, onde pudieron entrar inclusive nos despachos privaos de los congresistes.
La tarde de conflictu tuvo un saldu d’a lo menos cuatro muertos y catorce policíes mancaos, tuvo al mundu en tensión hasta que les fuercies de seguridá fueron quien a recuperar el control de les cámares. La ciudá de Whashington DC declaró toque de queda ayeri pa ser quien a controlar a los manifestantes pro Trump y caltién la declaración d’emerxencia pública pelo menos hasta’l 20 de xineru, cuando Joe Biden tome posesión del cargu de presidente na capital americana, nel que va ser ensin dulda l’ambiente más estrañu y peligrosu vistu na hestoria del país, guapamente dende la so guerra civil.
Son munches les voces que piden yá la destitución de Donald Trump pola so implicación y aliendu a les persones qu’asaltaron ayeri’l poder llexislativu de los EE.XX., anque entá nun paecen clares les posibilidaes técniques pa sacalu del poder nes dos selmanes que-y queden na Casa Blanca. Les próximes hores y díes van ser claves pa conocer el futuru políticu y llegal del magnate, asina como los detalles y el nivel de la so implición nel calificáu yá como intentu de golpe d’estáu.
