Efectivos de Bomberos del Serviciu d’Emerxencies del Principáu d’Asturies (SEPA) con base nel parque de Cangues d’Onís escastaron la quema declarada nuna cuadra, ensin animales, allugada na localidá canguesa de Tarano.
El fueu xamuscó por completu la cuadra pero evitaron que la vivienda amiesta resultara afectada poles llamaraes.
El Centru de Coordinación d’Emerxencies del 112 Asturies recibió l’avisu a les 10.58 hores. Na llamada señalaben que taba quemando una corte de dos altores. Nun había animales, esplicaron, pero había almacenada yerba na planta cimera y la construcción taba pegada a una casa.
La Sala 112 del SEPA movilizó una dotación de bomberos del parque cangués qu’a les 11.28 hores dieron per controláu la quema. La dotación permaneció nel llugar realizando xeres de ventilación y desescombru hasta les 12.48 hores que dieron per estinguíu’l fueu y retiraron pa tornar a parque.
