Les redes sociales fixéronse ecu güei de los polémicos nomes escoyíos pa los animales toriaos esta fin de selmana en Xixón, dientro de la Feria de Begoña. Especialmente criticaos fueron los nomes de los gües llamaos “Feminista” y “Nigeriano”, calificaos como machista y racista respectivamente por usuarios de les redes sociales.
La Feria d’esti añu, tres el parón pol covid en 2020, ta siendo abondo polémica pola cantidá de xente que s’axuntó nos tendíos de la Plaza d’El Bibio, lo que criticaron delles fuercies polítiques.
Amás, dende sectores antitaurinos, sigue reclamándose-y a l’acaldesa socialista de Xixón, Ana González, que cumpla colo aprobao nel 32 Congresu de la FSA-PSOE, que marcó como oxetivu sacar la tortura d’animales d’edificios públicos como la plaza toros xixonesa, asina como la fin de les corríes de toros n’Asturies. Mientres, Ana González tiró estos díes balones fuera, esplicando que ”quien los quier va y quien nun los quier nun va”, lo que contradiz la llinia marcada pol so propiu partíu dende 2017.
